વડોદરા, તા.1 યુકેની વર્ક પરમિટ અપાવવાના નામે સુરત જિલ્લાના દંપતી પાસેથી રૃા.૨૮.૯૦ લાખ ખંખેરી લીધા બાદ વડોદરાની એક મહિલા સહિત બે ભેજાબાજોએ હાથ અધ્ધર કરી દીધા હતાં.
સુરત જિલ્લાના માંગરોલ તાલુકાના લીંબાડા ગામમાં મંદિર ફળિયામાં રહેતી વિશ્વાકુમારી વિશાલસિંહ દેવધરાએ મકરપુરા પોલીસ સ્ટેશનમાં હેમાંગીનીબેન ઉર્ફે સ્વીટી અર્પણ પટેલ (રહે.દરજી ફળિયું, તરસાલી) અને સંતોષકુમાર રજનીકાંત શાહ (રહે.શ્રીજી સરલ એપાર્ટમેન્ટ, વૈકુંઠ-૧, વાઘોડિયારોડ)નોંધાવેલી ફરિયાદમાં જણાવ્યું છે કે હું ઘરકામ કરું છું તેમજ મારા પતિ કોસંબામાં રેસ્ટોરન્ટ ચલાવે છે. મારે અને મારા પતિને યુકેમાં વર્ક પરમિટ પર જવાનું હોવાથી ભરૃચના મારા પરિચિત ધાર્મિકભાઇ સોનીને વાત કરતાં તેમણે વડોદરામાં રહેતા હેમાંગીનીબેન ઉર્ફે સ્વિટી અર્પણભાઇ પટેલનો નંબર આપ્યો હતો.
મેં હેમાંગીનીબેન સાથે વાત કરતાં તેમણે રૃા.૨૮.૯૦ લાખનો ખર્ચ થશે તેમ જણાવ્યું હતું. તેમણે માંગેલા ડોક્યૂમેન્ટ મેં વોટ્સએપથી મોકલી આપ્યા હતાં. બાદમાં નવેમ્બર-૨૦૨૪માં હેમાંગીનીબેનનો ફોન આવ્યો હતો અને તમારો યુકેનો કોસ લેટર આવી ગયો છે હું તમને વોટ્સએપ પર મોકલું છું તમે મને પૈસા મારી દંતેશ્વરમાં સિધ્ધાર્થ મેગ્નમ પ્લસ ખાતે આવેલી ઓફિસમાં આવીને આપો એટલે તમને હેન્ડ ટુ હેન્ડ લેટર આપું તેમ કહ્યું હતું.
બાદમાં મેં મારા દાગીના પર લોન તેમજ મારા પરિચિત પાસેથી રૃા.૨૦ લાખ ઉછીના લીધા બાદ મેં રૃા.૧૫.૯૨ લાખ રોકડા તેમની ઓફિસમાં તેમજ અન્ય રકમ ઓનલાઇન મોકલી હતી. જો કે મારા અને પતિના વિઝા રદ થયા છે તેવો મેઇલ યુકે ગવર્નમેન્ટ તરફથી આવ્યો હતો. આ અંગે હેમાંગીનીબેનને વાત કરતાં તેમણે ફરી પ્રોસેસ કર્યો હતો પરંતુ ફરીથી વિઝા કેન્સલ થયા હતાં. તેમ છતાં હેમાંગીનીબેને વધુ રકમ માંગતા મેં તેમની પાસેથી કુલ રૃા.૨૮.૯૦ લાખ રકમ પરત માંગતા તેમણે ગલ્લા તલ્લા કર્યા હતાં.
