વડોદરા,ગોરવા શાક માર્કેટ પાસે સૂઇ રહેલા શ્રમજીવી પરિવાર પર ટેમ્પો ચઢી જતા ૬ વર્ષની બાળકી સહિત ચારને ઇજા થઇ હતી. અકસ્માતના પગલે બૂમાબૂમ થતા લોકો ભેગા થઇ ગયા હતા. ટેમ્પો ચાલકને પકડીને ગોરવા પોલીસને સોંપી દેવામાં આવ્યો હતો.
આણંદ જિલ્લાના આંકલાવ તાલુકાના ઉમેટા ગામે ઇન્દિરા કોલોનીમાં રહેતા લાલાભાઇ મહેબૂબભાઇ મકવાણા, ઉં.વ.૪૫ હાલમાં ગોરવા શાક માર્કેટ પાસે પરિવાર સાથે રહે છે. તેઓ મજૂરી કામ કરીને પરિવારનું ગુજરાન ચલાવે છે. ગઇકાલે રાત્રે લાલાભાઇ, તેમના પિતા,બહેન પૂજા (ઉં.વ.૧૯), પત્ની કાજલબેન તથા દીકરી રિયા (ઉં.વ.૬) જમી પરવારીને શાક માર્કેટની બાજુમાં સૂતા હતા.રાત્રે સાડા નવ વાગ્યે લાલાભાઇ મોબાઇલ જોતા હતા. તે દરમિયાન એક ટેમ્પો પૂરઝડપે આવ્યો હતો અને સૂઇ રહેલા પરિવાર પર ચઢી ગયો હતો. લાલાભાઇએ બૂમાબૂમ કરતા લોકો દોડી આવ્યા હતા. અકસ્માતમાં (૧) મહેબૂબભાઇને માથાના પાછળના ભાગે તથા કમરના ભાગે ઇજા થઇ હતી.(૨) ૧૯ વર્ષની પૂજાને કપાળના વચ્ચે, જમણા પગની એડી તથા દાઢીના ભાગે ઇજા થઇ હતી.(૩) ૬ વર્ષની રિયાને પેટની જમણી બાજુ તથા (૪) ૧૨ વર્ષના સાવન મકવાણાને જમણા હાથના પંજા પર ઇજા થઇ હતી. તમામ ઇજાગ્રસ્તોને સારવાર માટે ગોત્રી હોસ્પિટલમાં લઇ જવામાં આવ્યા હતા. બનાવની જાણ થતા ગોરવા પોલીસનો સ્ટાફ દોડી આવ્યો હતો. એ.એસ.આઇ. મહેશભાઇએ અકસ્માત કરનાર મહેશકુમાર લક્ષ્મીનારાયણ શર્મા (રહે. સંતોષી નગર, ખોડિયાર નગર પાસે, ન્યુ વી.આઇ.પી. રોડ) ને ઝડપી લીધો હતો. પોલીસે ગુનો દાખલ કરી આરોપીની ધરપકડ કરી છે.
અચાનક ટેમ્પાના એક્સિલેટર પર પગ પડી જતા ટેમ્પો ધસી ગયો
વડોદરા,
પોલીસની તપાસમાં એવી વિગતો જાણવા મળી છે કે, મહેશકુમાર ગોરવા શાક માર્કેટ પાસે ચોરાફળીનો ટેમ્પો લઇને ઊભો રહે છે. તેના સંબંધીએ નવો ટેમ્પો લીધો હોઇ તે મહેશકુમારને ટેમ્પો બતાવવા માટે આવ્યો હતો. મહેશકુમાર ટેમ્પામાં બેસીને જોતો હતો. તે દરમિયાન અચાનક તેનો પગ એક્સિલેટર પર પડી ગયો હતો. ટેમ્પો ચાલુ હાલતમાં હોઇ રેઝ થતા ગભરાઇ ગયેલા મહેશકુમારથી ગિયર પણ પડી જતા ટેમ્પો બેકાબૂ બનીને સૂઇ રહેલા પરિવાર પર ચઢી ગયો હતો.
