– શહેર-જિલ્લામાં છેલ્લા એક સપ્તાહમાં લૂંટ અને ચીલઝડપના 6 બનાવો
– મોં અને ગળું દબાવી હત્યા કરી વૃદ્ધાએ પહેરેલી સોનાની કડી અને ટોટીની લૂંટ થતાં ચકચાર
ભાવનગર : શહેર અને જિલ્લામાં કાયદો વ્યવસ્થાની કથળેલી સ્થિતિ અને તસ્કરો જાણે પોલીસતંત્રને ખુલ્લો પડકાર ફેંકતા હોય તેમ છેલ્લા એક સપ્તાહમાં લૂંટ અને ચીલ ઝડપના કુલ પાંચ બનાવો બન્યા છે. જિલ્લાના મહુવા તાલુકાના કોંજળી ગામે વૃદ્ધાની હત્યા કરી સોનાની કડી અને ટોટીની લૂંટ કર્યાંનો ચકચારી બનાવ બન્યો છે. જે અંગે મહુવા પોલીસે ગુનો નોંધી તપાસ હાથ ધરી છે.
તસ્કરો જાણે પોલીસતંત્રને ખુલ્લો પડકાર ફેકી રહ્યાં હોય તેમ છેલ્લા શહેર-જિલ્લામાં થોડાં દિવસોથી લૂંટ અને ચીલ ઝડપના બનાવો વધી રહ્યાં છે. ભાવનગર શહેર અને જિલ્લામાં ગત દિવસોમાં વધી રહેલા લૂંટ અને ચીલ ઝડપના બનાવો જિલ્લામાં કાયદો કથળેલી સ્થિતિ દર્શાવી રહી છે. દિવાળીના દિવસોમાં શહેરના રૂપાણી સર્કલ પાસે તથા ગત રોજ વિદ્યાનગરમાં વૃદ્ધાના સોનાના ચેઈનની ચીલ ઝડપના બનાવ, ઉપરાંત થોડાં દિવસો પૂર્વે શહેરના જશોનાથ સર્કલ પાસે વેપારી સાથે અને સિહોરના વૃદ્ધા સાથે લૂંટ બાદ આજે હિલડ્રાઈવ વિસ્તારમાં વૃદ્ધાના ઘરમાં ઘુસી લૂંટનો પ્રયાસની ઘટના તાજી છે ત્યાં જિલ્લામાં લૂંટ વિથ મર્ડરનો બનાવ બન્યો છે. મહુવા તાલુકાના કોંજળી ગામે ગત તા.૩૦-૧૦ના રાત્રિના ૯થી ૩૧-૧૦ની રાત્રિના ૮.૩૦ કલાકના અરસા દરમિયાન અજાણ્યા શખ્સો ઉજીબેન (ઉ.વ.૮૫) નામના વૃદ્ધાના ઘરમાં પ્રવેશી વૃદ્ધા ખાટલામાં સુતા હતા તે દરમિયાન તેમનું મોઢું અને ગળું દબાવી હત્યા કરી દીધી હતી અને વૃદ્ધાએ કાનમાં પહેરેલી સોનાની કડી ૬ નંગ અને કાનમાં પહેરેલી બે ટોટીની લૂંટ કરી નાસી છૂટયા હતા. બનાવ અંગે વૃદ્ધાના ભત્રીજા વિજયભાઈ દુલાભાઈ વાળાએ મહુવા ગ્રામ્ય પોલીસ મથકમાં અજાણ્યા શખ્સો વિરૂદ્ધ ફરિયાદ નોંધાવતા મહુવા ગ્રામ્ય પોલીસ સ્ટાફ ઘટના સ્થળે પહોંચી તપાસ હાથ ધરી છે.
