PM Narendra Modi Saudi Arabia visit : વડાપ્રધાન નરેન્દ્ર મોદી 22 એપ્રિલ, 2025ના રોજ સાઉદી અરેબિયાના બે દિવસના પ્રવાસ પર જશે. ક્રાઉન પ્રિન્સ મોહમ્મદ બિન સલમાનના આમંત્રણ પર આગામી 22-23 એપ્રિલ રોજ વડાપ્રધાન મોદીની ખાડી દેશની ત્રીજી મુલાકાત છે. સાઉદી અરેબિયાની પ્રવાસ દરમિયાન વડાપ્રધાન ત્યાંના નેતૃત્વ કરનારને મળશે અને દ્વિપક્ષીય વાટાઘાટો કરશે. જેમાં ઊર્જા અને સંરક્ષણ, ઈઝરાયલ-પેલેસ્ટાઈન સહિત મહત્ત્વના મુદ્દાઓ પર વાતચીત કરશે.
વિદેશ સચિવ વિક્રમ મિસ્ત્રીએ શું કહ્યું?
વડાપ્રધાન મોદી આ પહેલા વર્ષ 2016 અને 2019માં એમ બે વખત સાઉદી અરેબિયાનો પ્રવાસ કરી ચૂક્યા છે. વિદેશ સચિવ વિક્રમ મિસ્ત્રીએ કહ્યું હતું કે, ‘વડાપ્રધાનના આ પ્રવાસને લઈને બંને દેશો વચ્ચે રાજકીય સંબંધો પર કાઉન્સિલના બીજા સંમેલનમાં ઘણી અગત્યાની ચર્ચા થશે. બંને દેશો આ કાઉન્સિલ હેઠળની બે સમિતિઓ દ્વારા સતત વાતચીત અને સહયોગ કરી રહ્યા છે અને તે રાજકીય, સામાજિક, તકનીકી અને આર્થિક સ્તરે સહયોગ માટે એક મહત્ત્વપૂર્ણ દ્વિપક્ષીય પ્લેટફોર્મ છે.’
આ પણ વાંચો: સુપ્રીમ કોર્ટ VS સરકાર? ભાજપ સાંસદે કહ્યું- ભારતમાં ધાર્મિક યુદ્ધ ભડકાવવા માટે CJI જવાબદાર
આ અંગે માહિતી આપતા વિદેશ સચિવ વિક્રમ મિસ્ત્રીએ શનિવારે જણાવ્યું હતું કે, ‘આ મુલાકાત ભારત અને સાઉદી અરેબિયાના સંબંધો માટે ખૂબ જ મહત્વપૂર્ણ છે. સાઉદી અરેબિયા ઇસ્લામિક વિશ્વમાં એક મુખ્ય અવાજ છે અને હવે તે ક્ષેત્રીય બાબતોમાં પણ મોટી ભૂમિકા ભજવી રહ્યું છે. વડાપ્રધાન મોદી અને ક્રાઉન પ્રિન્સ મોહમ્મદ બિન સલમાન વચ્ચે સારા અને ઉષ્માભર્યા સંબંધો છે. તેમની પરસ્પર સમજણ અને ઉચ્ચ સ્તરીય વ્યૂહાત્મક વિચારસરણીએ બંને દેશો વચ્ચેના સંબંધોને વધુ મજબૂત બનાવ્યા છે.’
