Vadodara : વડોદરા શહેરના છેવાડે કોટંબી ખાતે બીસીએ સ્ટેડિયમમાં આગામી 11 જાન્યુઆરીએ ન્યૂઝીલેન્ડ અને ભારતીય ટીમ વચ્ચે વન-ડે ક્રિકેટ જંગ ખેલાશે. અત્યંત રસાકસીભર્યા આ જંગનો આનંદ લેવા ક્રિકેટ પ્રેમીઓ મોટી સંખ્યામાં ઉમટી પડવાની શક્યતા નકારી શકાતી નથી.
ઉલ્લેખનીય છે કે શહેરના છેવાડે આવેલા કોટંબી બી.સી.એસ સ્ટેડિયમ ખાતે આગામી 11મી જાન્યુઆરીએ રમાનારી ઇન્ટરનેશનલ મેચની ટિકિટો મેળવવા માટે ક્રિકેટ રસીયાઓ તત્પર બન્યા છે. પરિણામે આવા ક્રિકેટ રસીયાઓનો ગેરલાભ લેવા માટે ધુતારાઓ પણ ખૂબ એક્ટિવ થઈ ગયા છે. જાતજાતની વેબસાઈટો બનાવીને ક્રિકેટ રસીયાઓ સાથે ઠગાઈ કરવા તત્પર બની ગયા છે. આવા ગઠિયાઓની જાળમાં ક્રિકેટ રસીયાઓ ફસાઈ જાય એ પણ સ્વભાવિક છે. આવી કેટલીક વેબસાઈટ તો પણ સોશિયલ મીડિયા પર જોવા મળી રહે તો નવાઈ નહીં.
જ્યારે બીજી બાજુ ક્રિકેટ રસીયાઓને ધુતારાઓની આવી બોગસ વેબસાઈટ થી બચાવવા અંગે બરોડા ક્રિકેટ એસોસિએશન દ્વારા સત્તાવાર નિવેદન જાહેર કરવામાં આવ્યું છે. આ નિવેદનમાં જણાવ્યું છે કે બરોડા ક્રિકેટ એસોસિએશન દ્વારા વેબસાઈટની જુદી જુદી લિંકના માધ્યમથી બરોડા ક્રિકેટ એસોસિએશન દ્વારા કોઈપણ જાતની ટિકિટોનું વેચાણ કરવામાં આવતું નથી. બરોડા ક્રિકેટ એસોસિએશન દ્વારા વધુમાં જણાવ્યું છે કે, ક્રિકેટ રસીયાઓ માટે ટિકિટ બાબતે બુકિંગ અંગે આગામી એક-બે દિવસમાં ચોક્કસ જાહેરાત કરવામાં આવશે. જેમાં મોટાભાગે બુક માય શો દ્વારા ક્રિકેટ રસીયાઓ ટિકિટ બુકિંગ બાબતે જાહેરાત કરાશે.
જોકે, ક્રિકેટ રશિયાઓ માટે ક્રાઉડ મેનેજમેન્ટ સાથે સુરક્ષા વ્યવસ્થાનું પણ પાલન કરવા માટે બીસીએ દ્વારા જિલ્લા પોલીસ અધિકારીઓ, નેશનલ હાઇવે ઓથોરિટી સાથે બરોડા ક્રિકેટ એસોસિએશનના હોદ્દેદારોની તાજેતરમાં મીટીંગ યોજાઇ હતી. જેમાં પાર્કિંગ બાબત સહિત સ્ટેડિયમના મુખ્ય એન્ટ્રી ગેટ સહિત સુરક્ષા સંબંધી વિવિધ મુદ્દે ચર્ચા વિચારણા થઈ હતી. આ બેઠકમાં મેચના દિવસે ચોક્કસ રૂટ પરથી ટ્રાફિક ડાયવર્ઝન બાબતે પણ વિચારણા કરવામાં આવી હતી. ટુ વ્હીલર ફોરવીલર ના પાર્કિંગના સ્થળ સહિત પ્રેક્ષકો મીડિયા ની બેઠક વ્યવસ્થા એન્ટ્રી એક્ઝિટ ગેટ ખેલાડીઓ પ્રેક્ષકોની સુરક્ષા અને વોચ ટાવર ઉભા કરવા માટે પણ ચર્ચા વિચારણા કરવામાં આવી હતી. નવા બનેલા આ સ્ટેડિયમમાં અંદાજિત 30,000 જેટલા દર્શકોને માટે બેઠક વ્યવસ્થા છે જ્યારે વીવીઆઈપી અને વીઆઈપી સાથે જનરલ પાર્કિંગ માટે 2500થી વધુ વાહનો તેમજ 5000થી વધુ ટુવિલરો માટે પાર્કિંગની વ્યવસ્થા ગોઠવવાની પણ વિચારણા કરવામાં આવી હતી. આ ઉપરાંત ક્રિકેટ મેચની ટિકિટો માટે બરોડા ક્રિકેટ એસોસિએશન દ્વારા સત્તાવાર રીતે જાહેરાત કરાયા બાદ જ ક્રિકેટ રશિયાઓ ટિકિટ મેળવવા પ્રયત્ન કરે ટિકિટ ખરીદવા માટે ક્રિકેટ રસીકો સાયબર ધુતારાઓની જાળમાં ફસાઈ નહીં અને ક્રિકેટ મેચની ટિકિટના બ્લેક અને બોગસ ટિકિટનું વેચાણ ના થાય એ બાબતે પણ પોલીસ વોચમાં રહેશે.
