Vadodara Liqour Crime : વડોદરા શહેરની કપુરાઈ ચોકડી પાસેથી એસ.ટી. બસમાં મુસાફરી કરી રહેલા મધ્ય પ્રદેશના ત્રણ શખ્સોને પોલીસે દારૂ-બિયરના જથ્થા સાથે ઝડપી પાડી કાયદેસરની કાર્યવાહી હાથ ધરી છે.
કપુરાઈ પોલીસ ટીમને ગઈકાલે રાત્રે બાતમી મળી હતી કે છોટાઉદેપુર–જોડિયા, વિશ્વામિત્રી એક્સપ્રેસ એસ.ટી. બસમાં ત્રણ વ્યક્તિઓ દારૂનો જથ્થો ભરેલા થેલા સાથે મુસાફરી કરી રહ્યા છે અને બસ થોડા સમયમાં કપુરાઈ ચોકડી પહોંચવાની છે. આ માહિતીના આધારે પોલીસે કપુરાઈ ચોકડી પાસે પસાર થતી બસને અટકાવી તપાસ કરી હતી. પોલીસે બાતમી મુજબ ગુજલા ડાવર, મહેશ નાનભાયા કિકરિયા અને સુરલા કોદરસિંગ જમરા (ત્રણે રહે. અલીરાજપુર, મધ્ય પ્રદેશ)ને ઝડપી પાડ્યા હતા. તેમની પાસે રહેલા બે થેલાની તપાસ કરતાં રૂ.12,768 ની કિંમતની દારૂની 24 બોટલો તથા રૂ.9,600 ની કિંમતના બિયરના 48 ટીન મળી આવ્યા હતા. પોલીસે કુલ રૂ.22,368 નો મુદ્દામાલ કબજે કરી આરોપીઓ સામે પ્રોહિબિશનનો ગુનો નોંધ્યો હતો.
