image : Filephoto
Vadodara Vishwamitri River : વડોદરા શહેરમાં વિશ્વામિત્રી નદીના કારણે આવતા પૂરની શક્યતા નિવારવા વિશ્વામિત્રી નદી તથા તેને સંલગ્ન વિવિધ તળાવને ઊંડા કરવા, કાંસોની સફાઈ સાથે ઉંડા કરવા અને દેણા ખાતે નવીન તળાવ બનાવવાની કામગીરી ચાલી રહી છે. જેમાં પાલિકા તંત્રએ અત્યાર સુધી કુલ 3.15 લાખ ક્યુબિક મીટર માટી ઉલેચવાનું કામ કર્યું છે. સૌથી વધુ માટી દેણા તળાવ બનાવવા ઉલેચવામાં આવી છે.
વિશ્વામિત્રી નદી પૂર નિયંત્રણ સમિતિ દ્વારા શહેરના વિવિધ સ્થળોએ જુદા-જુદા પ્રકારની કામગીરી હાથ ધરવામાં આવેલ છે. જેવી કે, આજવા સરોવર ઊંડું કરવાનું કામ અંતર્ગત અંદાજે 10 લાખ ચો.મી.માં 1.5 મી. ઉંડુ કરી 15 લાખ ક્યુ.મી. માટી ખોદીને કાઢવાની કામગીરી ચાલી રહી છે. પ્રતાપપુરા સરોવર ઊંડું કરવા અંદાજે 3 લાખ ચો.મી.માં 5 થી 7મી. ઉંડુ કરી 20 લાખ ક્યુ.મી. માટી ખોદીને કાઢવાની કામગીરી કરવામાં આવી રહી છે. દેણા ગામ ખાતે નવીન તળાવ બનાવવા અંદાજે 50,000 ચો.મી. વિસ્તારમાં 5 મી. ઉંડુ કરી 2 લાખ ક્યુ.મી. માટી ખોદીને કાઢવાની કામગીરી ચાલી રહી છે. રેઇનવોટર હાર્વેસ્ટીંગ વેલ બનાવવા અંદાજે 600 નંગ, જેમાં 450 નાના અને 150 નંગ મોટી કેપેસીટીના ડીપ રીચાર્જ વેલ બનાવવાના, શહેરના 15 તળાવોના ડ્રેજીંગમાં અંદાજીત 3 લાખ કયુ.મી. માટી, શહેરના 10 તળાવોના આઉટલેટની કામગીરી અને વિવિધ કાંસોમાથી અંદાજીત 7.5 લાખ ક્યુ.મી. માટી/સ્લજ કાઢવાની કામગીરી કરવામાં આવી રહી છે.
વિશ્વામિત્રી નદીના 24 કી.મી.ના પટમાં રીસેક્શનીંગ, ડ્રેજીંગ અને મોડીફીકેશનની કામગીરી કરવાનું આયોજન હાથ ધરેલ છે. જેમાં અંદાજે 15 લાખ ક્યુ.મી. માટી કાઢવાની કામગીરી થઈ રહી છે. ચાલી રહેલી કામગીરી અંતર્ગત અત્યાર સુધી આજવા તળાવ ઊંડું કરવા 52,629 ક્યુબિક મીટર, પ્રતાપપુરા તળાવ ઊંડું કરવા 56,647 ક્યુબિક મીટર, દેણા ખાતે તળાવ બનાવવા 56,983 ક્યુબિક મીટર, શહેરના વિવિધ તળાવમાં ડ્રેજીંગ કરવા 32,814 ક્યુબિક મીટર, વિવિધ કાંસો પહોળી અને ઊંડી કરવા 1,12,745 ક્યુબિક મીટર, વિશ્વામિત્રી નદીના પટમાંથી 3,501 ક્યુબિક મીટર મળી અત્યાર સુધી કુલ 3,15,319 ક્યુબિક મીટર માટીનો જથ્થો અલગ-અલગ જગ્યાએથી નીકાળવામાં આવ્યો છે.
