વડોદરાઃ વડોદરા જિલ્લાની પાદરા તાલુકાની ખેતીવાડી ઉત્પન્ન બજાર સમિતિમાં ભાજપના જ બે આગેવાનો વચ્ચે જામેલા જંગ બાદ આજે પરિણામ જાહેર થતાં હાલના ધારાસભ્ય પ્રેરિત ભાજપની પેનલનો સફાયો થઇ ગયો છે.જ્યારે,પૂર્વ ધારાસભ્યની પેનલના ખેડૂત વિભાગના તમામ ૧૦ ઉમેદવારોનો વિજય થયો છે.
પાદરા બજાર સમિતિના ખેડૂત મત વિભાગ ની ૧૦ બેઠકો માટે ગઇકાલે મતદાન થયું હતું.જેમાં ૬૦૦ થી વધુ મતદારોએ મતદાન કર્યું હતું.આજે સવારે મતગણતરી યોજાતાં ભાજપના પૂર્વ ધારાસભ્ય દિનુમામા પ્રેરિત ખેડૂત સહકાર પેનલની શરૃઆતથી જ લીડ જારી રહી હતી.કોંગ્રેસના પૂર્વ ધારાસભ્ય સહિતના આગેવાનો પણ પૂર્વ ધારાસભ્યની પેનલની તરફેણમાં રહ્યા હતા.
નમતી બપોર સુધી ચાલેલી મતગણતરી બાદ તમામ ૧૦ બેઠકો પર ખેડૂત સહકારી પેનલના ઉમેદવારો અગ્રેસર રહેતાં તેમને ચૂંટાયેલા જાહેર કરવામાં આવ્યા હતા.આમ,પૂર્વ ધારાસભ્ય દીનુમામાનું ૩૦ વર્ષથી ચાલતું પ્રભુત્વ જળવાઇ રહ્યું હતું અને ભાજપના ધારાસભ્ય ચૈતન્ય ઝાલા પ્રેરિત પેનલનો સફાયો થતાં જિલ્લા ભાજપ પ્રમુખ રસિક પ્રજાપતિ અને ભાજપના અન્ય આગેવાનોની મહેનત માથે પડી હતી.
પરિણામો જાહેર થયા તેમાં ચૂંટાયેલી પેનલમાં સૌથી વધુ મત પ્રવિણસિંહ સિંધાને ૪૪૮ મત મળ્યા હતા.જ્યારે સૌથી ઓછા મત દસમા ક્રમાંકે વિજેતા બનેલા વિક્રમસિંહ સિંધાને ૩૬૨ મળ્યા હતા.પરાજય થયો તે પેનલમાં સૌથી વધુ મત પ્રદ્યુમનસિંહ ચૌહાણને ૨૨૩ અને સૌથી ઓછા મત રાજેન્દ્રસિંહ રાજને ૧૭૬ મળ્યા હતા.
ધાબળા પ્રકરણમાં ચર્ચામાં રહેલા પૂર્વ ચેરમેનને સાચવવા જતાં ભાજપે સત્તા ગુમાવી,કાર્યકરોએ ધાબળો ઉછાળ્યો
પાદરા એપીએમસીમાં ભાજપનો સફાયો થવાનું એક કારણ ધાબળા પ્રકરણમાં ચર્ચામાં આવેલા ભાસ્કર પટેલને અપાયેલા મહત્વનું હોવાનું મનાઇ રહ્યું છે.
થોડા સમય પહેલાં એક ક્લિનિકમાંથી મધરાતે ધાબળો ઓઢીને બહાર નીકળતા એપીએમસીના પૂર્વ પ્રમુખ ભાસ્કર પટેલનો વીડિયો વાયરલ થતાં ચકચાર વ્યાપી હતી.
ઉપરોક્ત બનાવ બાદ ભાસ્કર પટેલનું મહત્વ જળવાય તે માટે ધારાસભ્યના આગ્રહને કારણે જિલ્લા ભાજપ પ્રમુખે ભાસ્કર પટેલના પત્નીને મેન્ડેટ આપ્યો હોવાનું અને ભાજપની હાર માટે આ પણ એક કારણ હોવાનું કાર્યકરોમાં ચર્ચાઇ રહ્યું છે.આજે પરિણામ જાહેર થયું ત્યારે ઉત્સાહિત કાર્યકરોએ ધાબળો ઉછાળી વિજયોત્સવ મનાવ્યો હતો.
ખેડૂત વિભાગમાં કોને કેટલા મત મળ્યા
– સિંંધા પ્રવિણસિંંહ-૪૪૮ – પટેલ મુકેશભાઈ-૪૩૩
– પટેલ અલ્પેશકુમાર-૪૩૨ – પટેલ નિતિનભાઈ-૪૨૫
-પટેલ કમલેશભાઈ-૪૨૩ – પટેલ રાજેશભાઈ-૪૨૦
-પટેલ ચંદ્રકાંતભાઈ-૪૧૮ -પટેલ મયુરભાઈ-૪૧૮
-પરમાર અભેસિંંહ-૩૮૧ -સિંંધા વિક્રમસિંંહ-૩૬૨
વેપારી પેનલના ત્રણ ઉમેદવારો બિનહરીફ જાહેર થયા હતા
પાદરા તાલુકા ખેતીવાડી ઉત્પન્ન બજાર સમિતિની ચૂંટણીમાં વેપારી પેનલના ત્રણેય બેઠકો પર સચિનભાઈ કાળીદાસ ગાંધી, અજયકુમાર પ્રાણલાલ કાછીયા અને નટવરભાઈ સોમાભાઈ ગાંધી બિનહરીફ રીતે વિજેતા જાહેર થયા હતા.
