વડોદરાઃ વડોદરા જિલ્લા પંચાયતની જનરલ બોર્ડ મીટિંગમાં આજે ભાજપ અને કોંગ્રેસના સભ્યો વચ્ચે ઉગ્ર શાબ્દિક ટપાટપી થતાં માહોલ ગરમાયો હતો.
વડોદરા જિલ્લા પંચાયતની ત્રણ મહિને મળતી જનરલ બોર્ડ મીટિંગ આજે જિલ્લા પંચાયત ભવન ખાતે મળી ત્યારે એજન્ડામાં વિકાસના અનેક કામોનો સમાવેશ કરવામાં આવ્યો હતો.પરંતુ ભાજપ અને કોંગ્રેસના સભ્યો વચ્ચે વહીવટીતંત્ર પર પકડ નહિ હોવાના મુદ્દે તેમજ બજેટ છેતરામણંી હોવાના મુદ્દે તુતુ મૈમૈ થઇ હતી.
વિરોધ પક્ષના નેતાએ બજેટમાં અગાઉ ખેડૂત ભવન માટે રૃ.૭ કરોડ ફાળવવામાં આવ્યા હતા અને તેનો ઉપયોગ કેમ ના થયો તેવો સવાલ કર્યો હતો.આ ઉપરાંત તેમણે ચોમાસું પુરું થવા આવ્યું હોવા છતાં વરસાદી કાંસની સફાઇ માટે ફાળવેલા રૃ.૨૦ લાખ હજી વપરાયા નહી હોવાનો આક્ષેપ કર્યો હતો.જ્યારે,પ્રાકૃતિક ખેતી માટે પણ આવી જ રીતે બજેટમાં ફાળવેલા રૃ.૧૦ લાખ હજી વપરાયા નહી હોવાનો આક્ષેપ કર્યો હતો.
જેની સામે ભાજપના કારોબારી સમિતિના ચેરમેન,બાંધકામ ચેરમેન,પૂર્વ કારોબારી ચેરમેન સહિતના સભ્યોએ કોંગી સભ્યો માત્ર વિરોધ કરવાનો જ અભિગમ દાખવતા હોવાથી તેમના ચૂંટાયેલા સભ્યોની સંખ્યા બે આંકડામાં પહોંચતી નથી અને ઘટતી જાય છે તેવો જવાબ આપ્યો હતો.તો વિપક્ષી નેતા અને સભ્યોએ કારોબારી ચેરમેન સામે થયેલી પોલીસ ફરિયાદ અને ઉપપ્રમુખના ઇશારે ડભોઇમાં કોન્ટ્રાક્ટર પર હુમલા જેવા બનાવોનો ઉલ્લેખ કરાયો હતો.
ત્યારબાદ બંને પક્ષે આક્ષેપ-પ્રતિઆક્ષેપો બાદ હાથાપાઇ થાય તેવો માહોલ સર્જાતાં ઉગ્રતા વ્યાપી હતી.
સન્માન માટે આવેલા તેજસ્વી વિદ્યાર્થીઓ દ્શ્યો જોઇ ડઘાઇ ગયા
ઓ,આવી રીતે વાત નહિ કરવાની, ચાલ નીકળ હવે..આંગળી કોને બતાવે છે
વડોદરા જિલ્લા પંચાચતમાં આજે ધોરણ-૮ના તેજસ્વી વિદ્યાર્થીઓના સન્માનનો કાર્યક્રમ યોજાયો હતો.જે દરમિયાન આવા કાર્યક્રમ યોજવા માટે વિરોધ પક્ષના નેતા મુબારક પટેલે આપેલા સૂચન પછી પણ પત્રિકામાં તેમનું નામ નહિ છપાતાં તેમણે વિરોધ કર્યો હતો અને તે દરમિયાન ભાજપના નેતા કમલેશ પટેલ સાથે ઉગ્ર બોલાચાલી થઇ હતી.જેના કેટલાક અંશ અત્રે રજૂ છે.
વિપક્ષી નેતાઃ(પ્રાથમિક શિક્ષણાધિકારી ને ઉદ્ેશી) આ સૂચન અમારું હતું.તો પત્રિકામાં અમારું નામ કેમ નથી.
શિક્ષણાધિકારી પાન્ડેઃઅમે પ્રોટોકોલ પ્રમાણે જ કરીએ છીએ.
ભાજપના નેતાઃતમે આ શું કરો છો ?
વિપક્ષી નેતાઃ શું છે?
ભાજપના નેતાઃઓ,આવી રીતે વાત નહિ કરવાની.આંગળી કોને બતાવે છે?
વિપક્ષી નેતાઃતું ધ્યાન રાખજે હવે.
ભાજપ નેતાઃતું ધ્યાન રાખજે.
વિપક્ષી નેતાઃ આને સમજાવો,વાહવાહી કરવા કાર્યક્રમો યોજો છો.
વિદ્યાર્થિનીએ કહ્યું,અમારી સ્કૂલ તોડી નાંખી છે,બહાર બેસીએ છીએ
વિપક્ષીનેતાએ હાજર તેજસ્વી વિદ્યાર્થિનીઓને પૂછ્યું હતું કે,તમારી સ્કૂલોમાં કઇ તકલીફ છે?જે દરમિયાન ડેસર તાલુકાની વિદ્યાર્થિનીએ કહ્યું હતું કે,અમારી સ્કૂલ તોડી નાંખી છે,અને અમે બહાર બેસીને ભણીએ છીએ.જેથી વિપક્ષી નેતા અને સભ્યોએ પહેલાં સ્કૂલોમાં સવલતો આપો અને પછી આવા કાર્યક્રમો કરો તેમ કહી વિરોધ કર્યો હતો.
જિ.પં.ના બહુમાળી ભવન બનાવનાર સ્વ.જગદીશ પટેલનું સ્ટેચ્યૂ મુકાશે
વડોદરા જિલ્લા પંચાયતનું નવ માળનું સરદાર ભવન વર્ષ-૧૯૯૩ માં કોંગ્રેસના પીઢ નેતા સ્વ.જગદીશ પટેલના પ્રયાસોથી નિર્મિત કરવામાં આવ્યું હતું.જેથી કોંગ્રેસના નેતાએ પંચાયત ભવનમાં તેમનું સ્ટેચ્યૂ બનાવવા સૂચન કર્યું હતું.જેને પ્રમુખે સ્વીકાર્યું છે.જેથી હવે તેમનું સ્ટેચ્યૂ મુકાશે.
શક્તિના પર્વે જ મહિલાના અપમાનનો આક્ષેપ,મહિલા પ્રમુખ રોષે ભરાયા
વિપક્ષી સભ્યોએ તેમની રજૂઆતોના પેટા પ્રશ્નોનો જવાબ સમિતિઓના ચેરમેન આપે તેમ કહી સિંચાઇને લગતા પ્રશ્ન પૂછ્યા હતા.જેથી ભાજપના જરોદના સભ્યએ વિરોધ કર્યો હતો.કોંગી સભ્યએ મહિલાઓ સક્ષમ બને તે માટે તેમને જ જવાબ આપવા દો તેમ કહેતાં જરોદના સભ્યએ શક્તિના પર્વના દિવસે જ મહિલાને અપમાનિત કરો છો તેમ કહ્યું હતું.દરમિયાનમાં અધ્યક્ષ સ્થાનેથી પ્રમુખ પણ પહેલીવાર આક્રમક બન્યા હતા અને વિપક્ષને કહ્યું હતું કે,તમે વારંવાર વલણ બદલીને સભાને ડિસ્ટર્બ કરો છો.અમે પણ અહીં લોકોના કામો માટે જ આવ્યા છીએ.તમારા જેટલી જ ચિંતા અમને છે.
