આજે અમદાવાદમાં આયોજિત ચેક અર્પણ સમારોહમાં રાજ્ય સરકારે સ્વર્ણિમ જયંતિ મુખ્યમંત્રી શહેરી વિકાસ યોજના હેઠળ ૧૭ મહાનગર – નગર પાલિકાઓને આંતર માળખાકિય સુવિધાઓ ઊભી કરવા રૂ. ૨૮૦૦ કરોડ ફાળવ્યા છે. જેમાં વડોદરા મ્યુ. કોર્પોરેશનને રૂ. ૨૩૫ કરોડ પ્રાપ્ત થયા છે.
શહેરી વિકાસ અને શહેરી ગૃહ નિર્માણ વિભાગ, ગુજરાત સરકાર દ્વારા રાજ્યની મહાનગરપાલિકાઓ અને નગરપાલિકાઓના વિકાસ માટે અમદાવાદ ખાતે આજે ચેક અર્પણ સમારોહ યોજાયો હતો.
આ સમારોહમાં મુખ્યમંત્રી, નાયબ મુખ્યમંત્રી તથા અન્ય મંત્રીઓ અને અધિકારીઓના હસ્તે ૧૭ મહાનગરપાલિકાઓ અને નગરપાલિકાઓને આંતરમાળખાકીય સુવિધાઓ તેમજ વિવિધ વિકાસકાર્યો માટે કુલ રૂ. ૨૮૦૦ કરોડની ફાળવણીના ચેક અર્પણ કરવામાં આવ્યા હતા.
વડોદરા મ્યુ. કોર્પોરેશન વતી મેયર પિન્કીબેન સોની તથા મ્યુનિસિપલ કમિશનર અરુણ મહેશ બાબુ સહિતના પદાધિકારીઓએ રૂ. ૨૩૫ કરોડનો ચેક સ્વીકાર્યો હતો.
વર્ષ ૨૦૨૫-૨૯ માટે સ્વર્ણિમ જયંતિ મુખ્યમંત્રી શહેરી વિકાસ યોજના હેઠળ રાજ્ય સરકારે કુલ રૂ. ૪૫૫ કરોડની ફાળવણી કરી છે, જે અંતર્ગત વડોદરા મ્યુ. કોર્પોરેશનને આજે રૂ. ૨૩૫ કરોડની ફાળવણી પ્રાપ્ત થઈ છે. અગાઉ પણ આ યોજના હેઠળ વડોદરાને રૂ. ૧૩૦ કરોડની ફાળવણી કરવામાં આવી હતી. આ ગ્રાન્ટથી વડોદરા શહેરના નાગરિકોને મળતી સુવિધાઓમાં નોંધપાત્ર વધારો થશે તેવું મ્યુ. કોર્પોરેશન દ્વારા જણાવાયું છે.
