મુંબઈ : વર્તમાન મહિનાની દેશની ઉત્પાદન તથા સેવા ક્ષેત્રની સંયુકત પ્રવૃત્તિ ઓકટોબરની સરખામણીએ નવેમ્બરમાં સાધારણ નબળી પડી હોવાનું પ્રાથમિક અંદાજમાં સંકેતો મળી રહ્યા છે. ઉત્પાદન તથા સેવા ક્ષેત્રનો સંયુકત એચએસબીસી પરચેઝિંગ મેનેજર્સ’ ઈન્ડેકસ (પીએમઆઈ) જે ઓકટોબરમાં ૬૦.૪૦ હતો તે નવેમ્બરમાં ઘટી ૫૯.૯૦ સાથે છ મહિનાની નીચી સપાટીએ જોવા મળી રહ્યો છે એમ એસએન્ડપી ગ્લોબલ દ્વારા જારી કરાયેલા ડેટામાં જણાવાયું છે.
નવેમ્બરમાં ઉત્પાદન તથા સેવા ક્ષેત્રની પ્રવૃત્તિનું વિસ્તરણ ધીમું પડયું છે. ૫૦થી ઉપરના ઈન્ડેકસને જે તે ક્ષેત્રનું વિસ્તરણ કહેવામાં આવે છે.
ફેકટરી ઉત્પાદનમાં વૃદ્ધિ મે બાદ સૌથી નીચી સપાટીએ રહી છે. કેટલાક ઉત્પાદકોને નવા ઓર્ડરો મળવાની ગતિ ધીમી પડી છે. ઉત્પાદનની સરખામણીએ સેવા ક્ષેત્રની પ્રવૃત્તિ ઓકટોબરની સરખામણીએ ઝડપી વધી છે.
પીએમઆઈ ભલે ધીમો પડયો હોય પરંતુ કામકાજની સ્થિતિ મજબૂત રહી હોવાનું પણ સર્વે રિપોર્ટમાં નોંધવામાં આવ્યું છે. નવા નિકાસ ઓર્ડર ઓકટોબર પ્રમાણે જ રહ્યા છે. જો કે એકંદર નવા ઓર્ડરો ઘટયા છે જે જીએસટીને કારણે ઓર્ડરોમાં થયેલો વધારો હવે સમી ગયાના સંકેત આપે છે.
ખર્ચનું દબાણ હળવું થયું છે જેને પરિણામે માલસામાન તથા સેવાની કિંમત પણ ઘટી હોવાનો રિપોર્ટમાં દાવો કરાયો છે. ઉત્પાદન ક્ષેત્રનો પીએમઆઈ જે ઓકટોબરમાં ૫૯.૨૦ હતો તે ઘટી ૫૭.૪૦ રહ્યો છે. જો કે સેવા માટેની માગમાં વધારો થયો છે.
દેશના કેટલાક વિસ્તારોમાં ભારે વરસાદને કારણે નવા ઓર્ડરો મેળવવામાં મુશકેલી પડી રહી છે.
રોજગાર વૃદ્ધિ જળવાઈ છે, પરંતુ ૧૮ મહિનાની નીચી સપાટીએ રહી છે. નબળી માગ તથા કામના ઓછા ભારને કારણે ભરતીની ગતિ વર્તમાન મહિનામાં મંદ રહી હોવાનું પણ રિપોર્ટમાં નોંધવામાં આવ્યું છે.
સ્પર્ધાત્મક ભાવ વ્યૂહ, માર્કેટિંગ પહેલો અને ક્ષમતા વિસ્તરણના પ્રયાસોના ટેકાને કારણે ખાનગી ક્ષેત્રની કંપનીઓએ આગામી એક વર્ષમાં ઉત્પાદનમાં વૃદ્ધિની ધારણાં મૂકી છે. જો કે વેપાર વિશ્વાસ ૨૦૨૨ના મધ્ય બાદ નવેમ્બરમાં સૌથી નીચો જોવાઈ રહ્યો છે.
