– આણંદના પ્રાંત અધિકારી, ખાણ-ખનીજ વિભાગના અધિકારીઓ સહિતની ટીમ સાથે તંત્ર ત્રાટક્યું
– ગેરકાયદે અને રેતી મંજૂરી લીધી હોય પણ તેના કરતા વધુ રેતી ખનન કરતા શખ્સો સામે કાર્યવાહી : 10 ચારણા, 07 એક્સકવેટર મશીન, 25 બોટ, નાવડી, 25 પાઇપ સહિતની મત્તા કબજે લેવાઈ
આણંદ : આણંદ જિલ્લામાં ગેરકાયદેસર રીતે નદીના પટમાંથી રેતી ખનન કરતા અને પરવાનગી મેળવી હોય તેના કરતાં વધુ રેતી કાઢતા હોય તેવા શખ્સો ઉપર તંત્ર દ્વારા આકસ્મિક ચેકિંગ હાથ ધરવામાં આવ્યું હતુંં. ત્યારે વાસદ મહીસાગરના પટમાં ગેરકાયદે રેતી ખનન પર દરોડો પાડીને ૧૦ ચારણા, ૦૭ એક્સકવેટર મશીન, ૨૫ બોટ, નાવડી, ૨૫ પાઇપ સહિતનો ૪.૩૨ કરોડનો મુદ્દામાલ જપ્ત કરવામાં આવ્યો હતો. જે મુદ્દામાલ વધુ કાર્યવાહી માટે વાસદ પોલીસ સ્ટેશનને સોંપવામાં આવ્યો છે.
આણંદ જિલ્લામાં ગેરકાયદેસર રીતે નદીના પટમાંથી રેતી ખનન કરતા અને પરવાનગી મેળવી હોય તેના કરતાં વધુ રેતી કાઢતા હોય તેવા લોકો ઉપર આકસ્મિક ચેકિંગ હાથ ધરવામાં આવ્યું હતું. જિલ્લા કલેક્ટરની સૂચનાથી આણંદના પ્રાંત અધિકારી, આણંદ ગ્રામ્ય મામલતદાર, ખાણ અને ખનીજ વિભાગના અધિકારીઓ અને વાસદ પોલીસ સ્ટેશનના પોલીસ કર્મીઓની ટીમ બનાવીને બુધવારે સવારથી જ વાસદ મહીસાગરના પટમાં બ્રિજની પાસે ગેરકાયદેસર રીતે કોઈપણ જાતની પરવાનગી વગર રેતી ખનન કરનાર લોકો ઉપર આકસ્મિક રેડ કરવામાં આવી હતી.
પ્રાંત અધિકારી અને ટીમ દ્વારા વાસદના મહીસાગર નદીના પટમાંથી ગેરકાયદેસર રીતે રેતી ખનન કરનારા શખ્સો સામે પોલીસ બંદોબસ્ત સાથે ચેકિંગ કરવામાં આવતા વાસદ મહીસાગર નદીના પટમાંથી કોઈપણ મંજૂરી વગર નાવડી દ્વારા ગેરકાયદેસર રીતે રેતી ખનન કરનારા શખ્સો, તેમજ જેમણે ખાણ ખનીજ વિભાગની મંજૂરી લીધી હતી પરંતુ તેના કરતાં વધુ રેતી ખનન કરનારા લોકો સામે કાર્યવાહી કરવામાં આવી હતી. આ કાર્યવાહીમાં ૧૦ ચારણા, ૦૭ એક્સકવેટર મશીન, ૨૫ બોટ, નાવડી અને ૨૫ પાઇપ મળીને અંદાજિત રૂપિયા ૪.૩૨ કરોડનો મુદ્દામાલ જપ્ત કરવામાં આવ્યો હતો અને મુદ્દામાલ વાસદ પોલીસ સ્ટેશનને સોંપવામાં આવ્યો છે. તંત્રએ જણાવ્યું હતું કે, આણંદ જિલ્લામાં ગેરકાયદેસર રીતે રેતી ખનન કરનાર શખ્સો ઉપર આકસ્મિક તપાસ કરવામાં આવશે. આ ઝુંબેશ ચાલુ રહેશે અને ગેરકાયદેસર રીતે રેતી ખનન કરનાર શખ્સો સામે અને પરવાનગી મેળવી હોય પણ તેના કરતાં વધુ રેતી ખનન કરતા હોય તેવા શખ્સો સામે કાયદાકીય કાર્યવાહી કરવામાં આવશે, તેવી ચેતવણી આપવામાં આવી હતી.
