– ઓક્ટોબરમાં જીએસટી કલેક્શન રૂ. ૧.૯૬ લાખ કરોડ
– ગ્રોસ ડોમેસ્ટિક આવક બે ટકા વધીને ૧.૪૫ લાખ કરોડ, આયાતોમાંથી કરની આવક ૧૩ ટકા વધીને રૂ. ૫૦,૮૮૪ કરોડ
– જીએસટી કલેક્શન સતત ૧૦મા મહિને ૧.૮૦ લાખ કરોડથી વધુ જ્યારે ઓક્ટોબરમાં ૪.૬ ટકાની વૃદ્ધિ એક વર્ષમાં સૌથી ઓછી
નવી દિલ્હી: કેન્દ્ર સરકારે તહેવારોની મોસમમાં ઓક્ટોબરમાં જીએસટીના રેટમાં ઐતિહાસિક કાપ મૂક્યો હતો, જેને પગલે ૩૭૫ વસ્તુઓ પર જીએસટી ઘટી ગયો હતો. આમ છતાં ઓક્ટોબરમાં જીએસટીની આવકથી સરકારી તિજોરી છલકાઈ ગઈ છે. ઓક્ટોબરમાં સરકારને જીએસટી કલેક્શન વાર્ષિક ૪.૬ ટકા વધીને રૂ. ૧.૯૬ લાખ કરોડ થયું હતું. સરકારની આવકમાં આ વૃદ્ધિનું મુખ્ય કારણ તહેવારોની માગ અને નીચા જીએસટીથી વસ્તુઓના ભાવમાં થયેલા ઘટાડાના કારણે લોકોની ખરીદીમાં વધારો હતા.
કેન્દ્ર સરકારે શનિવારે જણાવ્યું કે, ઓક્ટોબર ૨૦૨૫માં ગ્રોસ જીએસટી કલેક્શન ૧.૯૬ લાખ કરોડ થયું હતું, જે વાર્ષિક ધોરણે ૪.૬ ટકાનો વધારો દર્શાવે છે. ઓક્ટોબર ૨૦૨૪માં જીએટી કલેક્શન ૧.૮૭ લાખ કરોડ રહ્યું હતું. આ વર્ષે ઓગસ્ટ અને સપ્ટેમ્બરમાં જીએસટી કલેક્શન ક્રમશઃ ૧.૮૬ લાખ કરોડ અને ૧.૮૯ લાખ કરોડ હતું.
આ સતત ૧૦મો મહિનો છે જ્યારે જીએસટી કલેક્શન રૂ. ૧.૮૦ લાખ કરોડથી ઉપર રહ્યું છે. આ પહેલા મે ૨૦૨૫માં જીએસટી કલેક્શન રૂ. ૨ લાખ કરોડને પાર થઈ ગયું હતું. ઓક્ટોબરમાં સ્થાનિક વેચાણના સંકેત આપતી ગ્રોસ ડોમેસ્ટિક આવક બે ટકા વધીને ૧.૪૫ લાખ કરોડ થઈ હતી જ્યારે આયાતોમાંથી કરની આવક ૧૩ ટકા વધીને રૂ. ૫૦,૮૮૪ કરોડ થઈ હતી. ઓક્ટોબરમાં જીએસટી રીફન્ડ વાર્ષિક ૩૯.૬ ટકા વધીને રૂ. ૨૬,૯૩૪ કરોડ રહ્યું હતું. આમ, રીફન્ડ એડજસ્ટ કર્યા પછી ઓક્ટોબરમાં જીએસટીની ચોખ્ખી આવક રૂ. ૧.૬૯ લાખ કરોડ રહી હતી, જે વાર્ષિક ધોરમે ૦.૨ ટકાની વૃદ્ધિ દર્શાવે છે.
ઓક્ટોબર ૨૦૨૫માં જીએસટી કલેક્શનમાં ઊછાળો એવા સમયે જોવા મળ્યો છે જ્યારે કેન્દ્ર સરકારે જીએસટીના દરોમાં ઐતિહાસિક ફેરફાર કરતાં ચારના બદલે બે દર અમલમાં મૂક્યા હતા. નવરાત્રીના પહેલા દિવસ ૨૨ સપ્ટેમ્બરથી અમલમાં આવેલા જીએસટી ના નવા દરોના કારણે ૩૭૫થી વધુ વસ્તુઓના ભાવમાં નોંધપાત્ર ઘટાડો થયો હતો. રસોડા માટે જરૂરી વસ્તુઓથી લઈને ઈલેક્ટ્રોનિક્સ અને ઓટોમોબાઈલ સુધીની વસ્તુઓના ભાવમાં ઘટાડો જોવા મળ્યો હતો.
જોકે, ઓક્ટોબરના કલેક્શનમાં તહેવારોની મોસમના વેચાણની મજબૂત અસર જોવા મળી હતી. કારણ કે અનેક ગ્રાહકોએ વસ્તુઓના ભાવમાં થયેલા ઘટાડાનો લાભ લઈને વ્યાપક પ્રમાણમાં ખરીદી કરી હતી. વડાપ્રધાન મોદીએ ૧૫ ઓગસ્ટે સ્વતંત્રતા દિવસના તેમના ભાષણમાં દિવાળી પહેલા જીએસટીના રેટમાં મોટા ઘટાડાની જાહેરાત કરી હોવાથી અનેક ગ્રાહકોએ આ ઘટાડા સુધી તેમની ખરીદી અટકાવી રાખી હતી. નવરાત્રીની શરૂઆત સાથે જીએસટીના રેટમાં ઘટાડો લાગુ થતા લોકોએ ખરીદી શરૂ કરી હતી.
તહેવારોની મોસમમાં જંગી ખરીદી છતાં ઓક્ટોબરમાં જીએસટી કલેક્શનની ૪.૬ ટકાની વૃદ્ધિ છેલ્લા એક વર્ષમાં સૌથી ધીમી રહી છે. સપ્ટેમ્બરમાં જીએસટી કલેક્શન ૯.૧ ટકા વધ્યું હતું, જે ચાર મહિનામાં સૌથી વધુ હતું. ઓગસ્ટમાં જીેસટી કલેક્શનમાં ૬.૫ ટકાનો વધારો જોવા મળ્યો હતો. સરકારે જાહેર કરેલા આંકડા મુજબ અરૂણાચલ પ્રદેશ, નાગાલેન્ડ, લક્ષદ્વિપ અને લદ્દાખ જેવા રાજ્યો-કેન્દ્રશાતિ પ્રદેશોમાંથી પણ જીએસટી કલેક્શનમાં નોંધપાત્ર ઊછાળો આવ્યો છે, જે સમગ્ર ભારતમાં આર્થિક વિકાસના સંકેત આપે છે.
