બી.સી.સી.આઈ. (બોર્ડ ઓફ કંટ્રોલ ફોર ક્રિકેટ ઇન ઇન્ડિયા) દ્વારા તા. 24 ડિસેમ્બરથી 8 જાન્યુઆરી દરમિયાન યોજાઈ રહેલી વિજય હજારે ટ્રોફી ઈલાઈટ મેન્સ સિનિયર ક્રિકેટ સ્પર્ધામાં રોમાંચક મુકાબલાઓ જોવા મળી રહ્યા છે. આ સ્પર્ધામાં ચાર ક્વોટર ફાઈનલ, બે સેમિફાઈનલ અને અંતે ફાઈનલ મેચ રમાશે.
ગઈકાલે રાજકોટ ખાતે રમાયેલી ગ્રુપ-બીની મહત્વપૂર્ણ મેચમાં બરોડા અને વિદર્ભ ટીમ આમને-સામને આવી હતી. વિદર્ભે ટોસ જીતી પહેલા ફિલ્ડિંગ કરવાનો નિર્ણય લીધો હતો. બેટિંગ કરવા ઉતરેલી બરોડા ટીમ તરફથી હાર્દિક પંડ્યાએ શાનદાર પ્રદર્શન કર્યું હતું. હાર્દિકે 92 બોલમાં આઠ ચોગ્ગા અને 11 છગ્ગા સાથે 133 રનની સ્ફોટક ઇનિંગ રમી હતી. તેના સહારે બરોડાની ટીમે 50 ઓવરમાં 9 વિકેટ ગુમાવી 293 રનનો મજબૂત સ્કોર ઊભો કર્યો હતો.
294 રનની લક્ષ્યાંક સામે વિદર્ભ ટીમે આત્મવિશ્વાસભર્યો ચેઝ કર્યો હતો. વિદર્ભ તરફથી અમન મોખડેએ અદભૂત બેટિંગ કરતા 121 બોલમાં 17 ચોગ્ગા અને ચાર છગ્ગા સાથે અણનમ 150 રન બનાવ્યા હતા. તેના સહારે વિદર્ભે 41.4 ઓવરમાં 296 રન બનાવી નવ વિકેટે આસાન જીત નોંધાવી હતી.
ગ્રુપ-બીની હાલની સ્થિતિ પર નજર કરીએ તો ઉત્તર પ્રદેશ (યુપી) ટીમે અત્યાર સુધી રમાયેલી તમામ પાંચ મેચોમાં જીત મેળવી અપરાજિત રહી છે. બરોડાની ટીમે પાંચ મેચોમાંથી ત્રણમાં જીત મેળવી છે જ્યારે બે મેચોમાં હારનો સામનો કર્યો છે. બીજી તરફ ચંદીગઢની ટીમે તમામ પાંચ મેચો હારી શરમજનક પ્રદર્શન કર્યું છે.
