રિપોર્ટ: અનુજ ઠાકર
આરોહી પટેલ, મલ્હાર ઠાકર અને તત્સત મુનશી સ્ટારર ‘લગન લાગી રે’નું પોસ્ટર રિવીલ; 6 ફેબ્રુઆરી 2026એ રિલીઝ થશે ફિલ્મ
વેલેન્ટાઇન વીકને વધુ ખાસ બનાવવા માટે ગુજરાતી સિનેમા એક નવી પ્રેમકહાની લઈને આવી રહ્યું છે. આરોહી પટેલ, મલ્હાર ઠાકર અને તત્સત મુનશી અભિનિત ગુજરાતી ફિલ્મ **‘લગન લાગી રે’**નું પહેલું પોસ્ટર સત્તાવાર રીતે રિલીઝ કરવામાં આવ્યું છે. ફિલ્મ આગામી વર્ષના વેલેન્ટાઇન સિઝનમાં, એટલે કે 6 ફેબ્રુઆરી 2026ના રોજ સિનેમાઘરોમાં રિલીઝ થવાની છે.
‘લગન લાગી રે’નું પહેલું પોસ્ટર રિવીલ
કોકોનટ મોશન પિક્ચર્સ અને અક્ષર કમ્યુનિકેશનના બેનર હેઠળ નિર્માણ પામેલી આ ફિલ્મ રશ્મિન મજીઠિયા અને આરતી વ્યાસના પ્રોડક્શનમાં બની છે. ફિલ્મનું દિગ્દર્શન સંદીપ પટેલે કર્યું છે. પોસ્ટરમાં પ્રેમ, લાગણી અને સંગીતની સુગંધ સ્પષ્ટ જોવા મળે છે, જે દર્શકોને એક હૃદયસ્પર્શી અનુભવ આપવાનો સંકેત આપે છે.
મજબૂત સ્ટારકાસ્ટ સાથે પ્રેમની કહાની
મિતાઈ શુક્લા અને નેહલ બક્ષીએ લખેલી આ ફિલ્મમાં આરોહી પટેલ, મલ્હાર ઠાકર અને તત્સત મુનશી સિવાય વેદિકા કૌલ વ્યાસ, આરતી વ્યાસ, રાગી જાની, હેમાંગ દવે સહિતના અનુભવી કલાકારો મહત્વની ભૂમિકામાં જોવા મળશે.
‘આવી ગઈ છે પ્રેમની મોસમ…’
ફિલ્મના કો-પ્રોડ્યુસર આરતી વ્યાસ પટેલે ઇન્સ્ટાગ્રામ પર પોસ્ટર શેર કરતાં લખ્યું હતું,
“આવી ગઈ છે પ્રેમની મોસમ… એક હૃદયસ્પર્શી વાર્તા તમારા પર જાદુ ચલાવવા માટે તૈયાર છે. મલ્હાર, તત્સત અને આરોહી તમારા દિલ જીતવા માટે સજ્જ છે. આ વેલેન્ટાઇન સિઝનમાં, પ્રેમને એવી રીતે ઉજવો, જેવી રીતે પહેલાં ક્યારેય નથી ઉજવ્યો. ‘લગન લાગી રે’ 6 ફેબ્રુઆરી 2026ના રોજ સિનેમાઘરોમાં રિલીઝ થશે.”
વેલેન્ટાઇન વીકમાં રિલીઝ થતી ‘લગન લાગી રે’ પ્રેમ, સંગીત અને લાગણીઓની નવી વ્યાખ્યા લઈને આવશે એવી અપેક્ષા દર્શકો રાખી રહ્યા છે.
