સાયબર ગઠિયાઓનો તરખાટ યથાવત
શરૃઆતમાં રોકાણ કરતા એક લાખનો નફો મળતા છેતરાયા ગાંધીનગર રેન્જ સાયબર ક્રાઇમ પોલીસની તપાસ
ગાંધીનગર : ગાંધીનગરમાં સાયબર ગઠિયાઓનો તરખાટ વધી રહ્યો છે ત્યારે
સેક્ટર ૨૬માં આવેલી ગુજરાત સ્ટેટ કોર્પોરેશનમાં આસિસ્ટન્ટ મેનેજર તરીકે કામ કરતા
અધિકારીને શેરબજારમાં રોકાણના નામે ગઠિયાઓએ ૩૪.૫૭ લાખ રૃપિયાનો ચૂનો ચોપડી દીધો
છે. જે સંદર્ભે ગાંધીનગર સાયબર ક્રાઇમ પોલીસે ગુનો દાખલ કરીને વધુ તપાસ શરૃ કરી
છે.
સમગ્ર દેશમાં હાલ સાયબર ક્રાઇમની ઘટનાઓ સતત વધી રહી છે અને લોકોને
રાતોરાત કમાણીની લાલચ આપીને સાયબર ગઠિયાઓ દ્વારા રોકાણ કરાવી છેતરપિંડી કરવામાં આવે
છે ત્યારે આ વખતે ગાંધીનગર શહેર નજીક રાધેજા ખાતે આવેલી શિવાલિક હોમ્સ વસાહતમાં રહેતા
અને મૂળ રાજસ્થાનના તેમજ સેક્ટર ૨૬માં આવેલી ગુજરાત સ્ટેટ કોર્પોરેશનમાં આસિસ્ટન્ટ
મેનેજર તરીકે કામ કરતા કપિલ ઘનશ્યામભાઈ શર્માને નિશાન બનાવવામાં આવ્યા છે. ગત ૧૩ નવેમ્બરના
રોજ તેઓ ઘરે હાજર હતા તે સમયે તેમના મોબાઈલ ઉપર એક મેસેજ આવ્યો હતો અને શેર માર્કેટમાં
રોકાણ સંબંધીત માહિતી આપી હતી ત્યારબાદ તેમની સાથે વાર્તાલાપ શરૃ કરીને શેરબજારની અલગ
અલગ ટીપ્સ આપવામાં આવી હતી. તેમને એક લિંક મોકલવામાં આવી હતી અને એ લિંકના આધારે નલ્વા
સન્સ ઇન્વેસ્ટમેન્ટ લિમિટેડ‘
નામની બનાવટી ટ્રેડિંગ કંપનીમાં રોકાણ કરવા માટે કહેવામાં આવ્યું હતું અને ત્યારબાદ
તેમણે શરૃઆતમાં ૫,૦૦૦નું રોકાણ
કર્યું હતું અને ૯૭,૦૦૦ના રોકાણ
સામે એક લાખ રૃપિયાનો નફો બતાવવામાં આવ્યો હતો. જેથી તેમને વિશ્વાસ બેઠો હતો અને જેના
પગલે તેમણે અલગ અલગ બેંક ખાતાઓમાંથી કુલ ૩૪.૫૭ લાખ રૃપિયાનું રોકાણ કરી દીધું હતું.
જોકે તેમણે આ રૃપિયા ઉપાડવાનો પ્રયાસ કરતા તે ઉપડી શક્યા ન હતા અને તેમની સાથે છેતરપિંડી
થઈ હોવાનો અહેસાસ થતાં સાયબર ક્રાઈમ હેલ્પલાઇનમાં જાણ કરી હતી અને ત્યારબાદ આ સંદર્ભે
ગાંધીનગર રેન્જ સાયબર ક્રાઇમ પોલીસમાં ફરિયાદ આપવામાં આવતા પોલીસે ગુનો દાખલ કરીને
સાયબર ગઠિયાઓની શોધખોળ શરૃ કરી છે.
