Gujarat economic ranking: સમૃદ્ધ ગુજરાતમાં માથાદીઠ આવક વધી હોવાનો સરકારે દાવો કર્યો છે. હકીકતમાં ગુજરાતમાં લોકોની ખરીદ શક્તિ ઘટી છે. સરેરાશ માસિક ખરીદ ખર્ચમાં ગુજરાત પાછલા ક્રમે રહ્યુ છે જ્યારે અન્ય રાજ્યોની સ્થિતી ઘણી સારી છે. કેન્દ્ર સરકારના રિપોર્ટના મતે, ગુજરાતમાં શહેરોમાં માસિક ખરીદ પાછળ રૂ.7175 ખર્ચાય છે જ્યારે ગામડાઓમાં રૂ.4146 ખર્ચ કરવામાં આવી રહ્યો છે. આ જોતાં માસિક ખર્ચમાં શહેરો અને ગામડાઓમાં મોટી અસમાનતા રહી છે. આ જોતાં ગુજરાતમાં લોકો ખર્ચ ઘટાડવા મજબૂર બન્યાં છે. સાથે સાથે લોકોના ખિસ્સામાં પૈસા નથી એ વાત સાચી ઠરી છે.
ગુજરાતના શહેરોમાં માસિક ખરીદ ખર્ચ રૂ.7175 જ્યારે ગામડામાં રૂ,4146
એક પરિવાર મહિને ખોરાક, પરિવહન, દવા, શિક્ષણ, વસ્ત્રો સહિત રોજીંદી જરૂરિયાતો પર સરેરાશ ખર્ચ કરે છે. કેન્દ્ર સરકારના રિપોર્ટે પરથી લોકોની આર્થિક પરિસ્થિતીનું સાચુ પ્રતિબિંબ રજૂ થયુ છે કેમકે, રોજગાર-આવક વધે તો જ ખરીદ શક્તિ પણ વધે. ગુજરાતમાં શહેરી વિસ્તારોમાં સરેરાશ માસિક ખરીદ ખર્ચ રૂ.7175 થઇ રહ્યો છે જ્યારે ગામડામાં રૂ.4146 ખર્ચ કરાય છે. આ જોતાં શહેરો અને ગ્રામિણ વિસ્તારના ખરીદ ખર્ચ વચ્ચે મોટી અસમાનતા જોવા મળી રહી છે. એ વાત સાબિત થઇ છેકે, શહેરોની સરખામણીમાં ગામડાઓમાં લોકોની ખરીદ શક્તિ વઘુ ઘટી છે. કારમી મોઘવારી વચ્ચે લોકો રોજગારી માટે ફાંફા મારી રહ્યાં છે. સ્થિર આવક વચ્ચે ખર્ચ વધી રહ્યો છે પરિણામે આર્થિક તંગીનું ચિત્ર ઉપસ્યુ છે.
આ તરફ, ગુજરાતની સરખામણીએ ચંદીગઢ, ગોવા, હિમાચલ પ્રદેશ, સિક્કીમ, પોડીચેરી, દિલ્હી, તામિલનાડુ સહિત અન્ય રાજ્યોની સરેરાશ માસિક ખર્ચની સ્થિતી ઘણી સારી છે. દેશમાં શહેરી વિસ્તારની માસિક ખર્ચની દ્રષ્ટિએ ગુજરાત 23માં ક્રમે રહ્યુ છે જ્યારે ગ્રામિણ વિસ્તારની દ્રષ્ટિએ 27મા ક્રમે રહ્યુ છે. રાષ્ટ્રીય માસિક ખરીદ ખર્ચ રૂ.6996 રહ્યો છે તે જોતાં ગુજરાતના ગ્રામિણ વિસ્તારનો ખરીદ ખર્ચ ઓછો રહ્યો છે.
રાજ્યમાં આજે લોકોની આર્થિક સુધાર માટે અનેક સરકારી યોજના અમલમાં છે તેમ છતાંય ગરીબ કુંટુબોની સંખ્યામાં ઘટાડો થઇ શક્યો નથી. આજે પણ ગુજરાતમાં મફત અનાજ પર નિર્ભર ગરીબ કુટુંબોની સંખ્યા ઘણી મોટી છે. સિમિત આવકને લીધે લોકોએ ખર્ચ પણ સિમિત કર્યો છે. આ જોતાં ગુજરાતમાં જીવન નિર્ભર કરવા સંઘર્ષ કરી રહ્યાં છે તે વાત પ્રસ્થાપિત થઇ છે.
