અમદાવાદ,સોમવાર
શહેરના ઘાટલોડિયા વિસ્તારમાં રહેતા યુવકને ગાંધીનગર શહેરી વિકાસ મંડળ દ્વારા તૈયાર કરવામાં આવેલા મકાન રાહતદરે અપાવવાનું કહીને નિકોલમાં રહેતા એક ગઠિયાએ યુવક સહિત અનેક લોકો સાથે લાખો રૂપિયાની છેતરપિંડી આચરી હોવાની ફરિયાદ સોલા પોલીસ મથકે નોંધવામાં આવી છે.
ઘાટલોડિયામાં આવેલી ચાણક્યપુરી સોસાયટીમાં રહેતા ભૌમિકભાઇ પટેલે નોંધાવેલી ફરિયાદની વિગતો એવી છે કે ભૌમિકભાઇના પિતરાઇભાઇનો મિત્ર ચેતન વેકરિયા (રહે.સુંદરવન સોસાયટી, કેનાલ પાસે, નિકોલ) અવારનવાર કારગીલ ચાર રસ્તા પાસે આવેલા સત્યમેવ-૨ કોમ્પ્લેક્સ ખાતે નિયમિત રીતે મળતો હોવાથી મિત્રતા થઇ હતી. તેણે જણાવ્યું હતું કે ગાંધીનગર શહેરી વિકાસ મંડળ (ગુડા) દ્વારા સરગાસણમાં રાહતદરે મકાનનું ફોર્મ મે ભર્યુ છે અને મારે ઉપર સુધી પરિચય હોવાથી મને મકાન મળી જશે. સાથેસાથે તેણે ભૌમિકભાઇને સસ્તામાં મકાન અપાવવાનું કહીને ફોર્મ આપ્યું હતું. જેથી વિશ્વાસ કરીને ભૌમિકભાઇએ તેમના ભાઇ ધવલના નામે ફોર્મ લઇ ફીના નાણાં આપીને ફોર્મ ભરી આપ્યું હતું. જેના થોડા મહિના બાદ ભૌમિકભાઇના વિજાપુર પાસે આવેલા ધનપુરા ગામના સરનામા પર ગુડા દ્વારા એક પત્ર આવ્યો હતો.જે પત્ર અંગે ચેતનને જાણ કરતા ચેતને પત્ર લઇને તપાસ કરવાનું કહીને જણાવ્યું હતુ કે ધવલને ડ્રોમાં મકાન લાગ્યુ છે. જો તમારે જોઇતુ હોય તો ફોર્મ ભર્યા વિના મળી જશે અને મકાન લાગ્યુ હોવાનુ કહીને વિવિધ ખર્ચ પેટે કુલ નવ લાખ રૂપિયા લીધા હતા. ત્યારબાદ ફરીથી એક પત્ર આવ્યો હતો. જેમાં તેમાં મકાન ફાળવવામાં આવ્યું હતુ. જેથી ચેતને તેમને ૩૧મી માર્ચના રોજ ગાંધીનગર ઉદ્યોગભવન પર જવાનુ કહ્યું હતું. પરંતુ, ચેતનનો ફોન સ્વીચ ઓફ આવતો હતો. જેથી ગુડાની ઓફિસમાં જઇને ભૌમિકભાઇએ તપાસ કરી ત્યારે તે ચોંકી ઉઠયા હતા. કારણ કે ગુડા દ્વારા કોઇ પત્ર લખાયો નથી અને મકાન પણ ફાળવવામાં આવ્યું નહોતુ. આમ, ચેતન મકાનના નામે છેતરપિંડી આચરીને ફરાર થઇ ગયો હતો. આ અંગે સોલા પોલીસે તપાસ કરતા જાણવા મળ્યું હતું કે તેણે અનેક લોકો પાસે લાખો રૂપિયા લઇને છેતરપિંડી આચરી હતી.
