નેશનલ હાઈવે નંબર-૪૮ નજીક આવેલા સુંદરપુરા પાટિયા પાસેના ઓર્નેટ વિલા કોમ્પ્લેક્સમાં આજે ધોળા દિવસે થયેલી યુવકની હત્યાની ઘટનાએ વિસ્તારમાં ચકચાર જગાવી મૂકી છે.હેર સ્ટુડિયો નામની સલૂનની દુકાનમાં કામ કરતા એક કર્મચારીની સામાન્ય બાબતમાં તીક્ષ્ણ હથિયારના ઘા ઝીંકીને ધાતકી હત્યા કરાઈ હતી.
મળતી માહિતી મુજબ, મૂળ ભરુચનો રહેવાસી મિતેશ વાળંદ સલૂનની દુકાનમાં કામ કરતો હતો. આજે બપોરે આશરે ૨ :૩૦ વાગ્યાના સમયે દુકાનમાં કામ કરતા તેનો સાથી કર્મચારી અજય લીમ્બાચીયા નજીકમાં કોલ્ડ્રીંક્સ લેવા ગયો હતો. તે દરમિયાન મિતેશ દુકાનમાં એકલો હતો.
અજયના જણાવ્યા મુજબ, તે પરત ફર્યો ત્યારે દુકાનમાં મિતેશ લોહીથી લથપથ હાલતમાં પડેલો હતો. નજીકમાં કરિયાણાની દુકાન ધરાવતા કિરણ દુકાનમાં ધૂસી આવ્યો હતો અને તીક્ષ્ણ હથિયાર વડે મિતેશ પર હુમલો કર્યો હોવાનું જાણવા મળ્યું છે.
આ ઘટનાની જાણ થતાં દુકાનના માલિક કૃણાલભાઈ સ્થળ પર દોડી ગયા હતા અને પોલીસને જાણ કરી હતી. મિતેશને સારવાર માટે સયાજી હોસ્પિટલ ખસેડવામાં આવ્યો હતો, જ્યાં ફરજ પરના તબીબોએ તેને મૃત જાહેર કર્યો હતો.
કપુરાઈ પોલીસ સ્ટેશનનો સ્ટાફ તેમજ ઉચ્ચ અધિકારીઓનો કાફલો ઘટના સ્થળે દોડી ગયો હતો. પ્રાથમિક તપાસમાં સામે આવ્યું છે કે, સલૂનની દુકાનની બહાર સામાન અને બોર્ડ રાખવાના મુદ્દે મિતેશ અને કિરણ વચ્ચે અગાઉથી તણાવ હતો . આજની ઘટનામાં એ જ મુદ્દે ઝઘડો ઉગ્ર બનતા હુમલો થયો હોવાનું અનુમાન વ્યક્ત કરાયું છે. પોલીસે હત્યાનો ગુનો નોંધી આરોપીની શોધખોળ શરુ કરી છે.
