Surat Chain Snatching Case: સુરત શહેરમાં તસ્કરો પણ બેફામ બન્યા છે, ગત 31મી જાન્યુઆરીના રોજ શહેરના અડાજણ અને ઉધના વિસ્તારમાં બે ગૃહિણીઓના ગળામાંથી સોનાની ચેઈન ઝૂંટવી ફરાર થઈ જનાર આરોપી શાહિલ ઉર્ફે શાહુ શેખને ઉધના પોલીસે ઝડપી પાડ્યો છે. પોલીસે આરોપી પાસેથી 2 લાખ રૂપિયાથી વધુનો મુદ્દામાલ કબજે કર્યો છે.
સીસીટીવીમાં ઘટના કેદ થઈ
મળતી માહિતી અનુસાર, તસ્કર શાહિલે એક જ મોડસ ઓપરેન્ડીથી બે અલગ-અલગ વિસ્તારોમાં ત્રાટક્યો હતો. પહેલી ઘટના અડાજણમાં બપોરે 2:15 વાગ્યે શંખેશ્વર હાઈટ્સમાં રહેતા જ્યોત્સ્નાબેન પટેલ એક પ્રસંગમાંથી પરત ફરી રહ્યા હતા ત્યારે વૈષ્ણોદેવી લાઈફ સ્ટાઈલ નજીક મોપેડ પર આવેલા આરોપીએ તેમના ગળામાંથી 14 હજાર રૂપિયાની કિંમતનો અછોડો ઝૂંટવી લીધો હતો.
બીજી ઘટના ઉધનામાં બપોરે 3:00 વાગ્યે સોનમબેન દવે નામના મહિલા પોતાના પુત્ર સાથે મોપેડ પર જઈ રહ્યા હતા ત્યારે તેરાપંથ ભવન પાસે આ જ શખસે તરાપ મારી 1 લાખ રૂપિયાની કિંમતની સોનાની ચેઈન આંચકી લીધી હતી.
આ પણ વાંચો: અમદાવાદ બાળ તસ્કરી કેસમાં મોટો ઘટસ્ફોટ: બાળકની સાથે બર્થ સર્ટિફિકેટ પણ અપાતું, એજન્ટોનું મોટું નેટવર્ક સક્રિય
પોલીસે તપાસનો ધમધમાટ તેજ કર્યો હતો
બંને ઘટનાઓની ગંભીરતા જોઈ ઉધના પોલીસે તપાસનો ધમધમાટ તેજ કર્યો હતો. પોલીસે ઉધનાથી લિંબાયત સુધીના અંદાજે 200 જેટલા સીસીટીવી કેમેરા ચેક કર્યા હતા. ટેક્નિકલ સર્વેલન્સમાં જાણવા મળ્યું કે બંને ગુનામાં એક જ મોપેડ વપરાયું હતું. હ્યુમન ઇન્ટેલિજન્સની મદદથી પોલીસે આરોપીનું લોકેશન લિંબાયત વિસ્તારમાં ટ્રેસ કર્યું અને શાહિલ ઉર્ફે શાહુ શેખને દબોચી લીધો હતો.
પોલીસ હવે એ તપાસ કરી રહી છે કે શાહિલે અગાઉ આ જ રીતે અન્ય કેટલી મહિલાઓને નિશાન બનાવી છે અને તેની સાથે અન્ય કોઈ સાગરીત સામેલ છે કે કેમ.
