Surat Corporation : સુરત મ્યુનિ. કમિશનર ટેકનોલોજીનો મહત્તમ ઉપયોગ કરીને પાલિકાની કામગીરી સરળ બનાવવા માટે પ્રયાસ કરી રહ્યાં છે જેના ભાગરૂપે આજે પાલિકાનું ‘વિઝિટર્સ હેલ્પ ડેસ્ક’ શરૂ કરવામાં આવ્યું છે અને તેના ઉપયોગથી ફરિયાદના ઝડપી નિકાલ થશે તેવો દાવો કરવામાં આવી રહ્યો છે. આ ઉપરાંત વેરો બાકી છે કે નહીં તેવી માહિતી સાથે ફરિયાદ-અરજી કરનારાની તમામ માહિતી પાલિકાને ડેસ્ક પર આવી જશે અને કોણ ક્યા પ્રકારની ફરિયાદ કરે છે તેનો પણ ખ્યાલ આવી જશે જેથી બોગસ ફરિયાદ કરનારાઓને પણ ઝડપથી ઓળખી કઢાશે.
પાલિકામાં દર સોમવારે અંદાજે 125 જેટલા નાગરિકો કમિશનરની મુલાકાત તથા ફરિયાદ માટે આવે છે, જ્યારે અઠવાડિયામાં કુલ 200થી વધુ લોકો વિવિધ રજૂઆત પાલિકા કચેરીએ આવતા હોય છે. જેઓ લેખિતમાં અરજી કે ફરિયાદ આપતા હોય તેમની ફરિયાદ જવાબદાર અધિકારી સુધી પહોંચાડવા અને તેના નિકાલ માટે લાંબો સમય પસાર થઈ જાય છે. આ સમસ્યા નિવારવા માટે હવે હેલ્પ ડેસ્ક પર જ તમામ માહિતી સાથે સીધું માર્ગદર્શન અને ઓનલાઈન અરજી કરવાની સુવિધા શરુ કરવામાં આવી છે.
નવી વ્યવસ્થા હેઠળ કમિશનરના પીએ ઓફિસના તાલીમબદ્ધ સ્ટાફ દ્વારા અરજી સ્વીકારી તેને સંબંધિત વિભાગ સુધી એક ક્લિકમાં પહોંચાડી દેશે. જેના કારણે નાની અને સામાન્ય ફરિયાદનો ઝડપી નિકાલ થશે તેવો દાવો થઈ રહ્યો છે. જોકે, આ સાથે પાલિકાએ નવું સોફ્ટવેરનો ઉપયોગ પણ કર્યો છે તેના કારણે હેલ્પ ડેસ્ક પર ફરિયાદીની ઓનલાઈન એન્ટ્રી થતાં તેની અગાઉની રજૂઆત, કેટલા વખત અરજી કરી, ક્યારે આવી ચૂક્યા છે તેમજ પાલિકાનો વેરો બાકી છે કે નહીં જેવી માહિતી પણ તરત ઉપલબ્ધ થશે. કયા વિસ્તારમાંથી કઈ પ્રકારની ફરિયાદ વધુ આવે છે તેનો ડેટા પણ હવે તંત્રને સરળતાથી મળી રહેશે અને નનામી અરજીનું દૂષણ પણ દૂર થશે.
હેલ્પ ટેક્સના ફાયદા
- દર સોમવારે મુલાકાત માટે આવતા વિઝિટર્સની રજૂઆત, અરજી અને ફરિયાદોનું ત્વરિત અને અસરકારક નિરાકરણ
- હેલ્પ ડેસ્ક દ્વારા નાગરિકોને જરૂરી, યોગ્ય અને સચોટ માહિતી પૂરી પાડવામાં આવશે તેમજ સંબંધિત વિભાગ અંગે માર્ગદર્શન
- નાગરિકોની અરજી સ્વીકારી તે સંબંધિત વિભાગ સુધી સમયસર પહોંચાડવાની કામગીરી કરવામાં આવશે
- પબ્લિક એનાઉન્સમેન્ટ સિસ્ટમ દ્વારા નાગરિકો સાથે સરળતાથી સંવાદ કરી મહત્વપૂર્ણ સૂચનાઓ, જનજાગૃતિ સંદેશા તથા માર્ગદર્શન પ્રસારિત કરવામાં આવશે.
- નાગરિકોને વધુ સુલભ, વિશ્વસનીય અને નાગરિક કેન્દ્રિત સેવા ઉપલબ્ધ થાય તે હેતુસર હેલ્પ ડેસ્ક ખાતે તાલીમબદ્ધ સ્ટાફ દ્વારા સહાય પૂરી પાડવામાં આવશે.
