સુરત શહેરમાં દબાણ કરનારાઓ પાલિકા અને પોલીસને પડકાર ફેંકતા હોય તેમ ટ્રાફિકથી ધમધમતા તાપી બ્રિજ પર જ રવિવારી બજાર શરુ કરી દીધું હતું. લો લેવલ બ્રિજની બન્ને બાજુએ માથાભારે તત્વોએ દુકાન શરુ કરી દીધું હતું અને લોકો પણ ખરીદી કરનારાઓએ બ્રિજ પર જ વાહનો પાર્ક કરી ટ્રાફિક સમસ્યા ઉભી કરી દીધી હતી. બ્રિજના બન્ને છેડે CCTV કેમેરા છે અને આ કેમેરા નીચે જ માથાભારે તત્વોએ દબાણ કરી દીધા હોવા છતાં પાલિકા અને પોલીસ તંત્રએ કોઈ કામગીરી ન કરતા દબાણ કરનારની હિંમત વધી રહી છે.
સુરતના સામાન્ય લોકો પાસે કાયદાનો અમલ કરાવવા માટે પાલિકા અને પોલીસ વાઘ બનીને કામગીરી કરે છે પરંતુ કાયદાનો છડેચોક કાયદાનો ભંગ કરનારાઓ સામે પાલિકા- પોલીસ બિલાડી બની ગઈ રહી છે. પાલિકા- પોલીસની આવી વિવાદી કામગીરી સામે પ્રજામાં ભારે અસંતોષ જોવા મળી રહ્યો છે. સુરતમાં વાહન ચાલકો હેલ્મેટ કે સીટબેલ્ટ પહેર્યા ન હોય કે કચરો નાખતા હોય તો શહેરમાં મુકેલા સીસી કેમેરા થી લોકોને દંડ કરવામાં આવે છે. પરંતુ આ કેમેરાનો ઉપયોગ કાયદાનો છડેચોક ભંગ કરી સ્વામી વિવેકાનંદ લો લેલવ બ્રિજ પર જ સામુહિક દબાણ કરી દીધું હોવા છતાં આ સીસી કેમેરાની આંખ બંધ થઈ ગઈ છે.
સામાન્ય રીતે રવિવારી બજાર તાપી નદીના કિનારે ભરાય છે પરંતુ માથાભારે તત્વો આ રવિવારી બજાર લો લેવલ બ્રિજ પર વધારી રહ્યાં છે. આજે સવારથી જ એક બાદ એક માથાભારે દબાણ કરનારાઓએ બ્રિજ પર રવિવારી બજાર શરુ કરી દીધું હતું. એક બાદ એક દબાણ થવા છતાં CCTV ની નજરમાં આ દબાણ ન આવતાં જોત જોતામાં આખો બ્રિજ રવિવારી બજારના દબાણના કારણે ઉભરાઈ ગયો હતો.
આ બ્રિજ પર પાલિકા અને પોલીસ દ્વારા મુકાયેલા કેમેરાની સામે જ માથાભારે તત્વો સમુહમાં દબાણ કરતા હોવા છતાં પાલિકા કે પોલીસે કોઈ કામગીરી કરી નથી. જેના કારણે બ્રિજ પરથી પસાર થતા વાહન ચાલકોને ભારે મુશ્કેલીનો સામનો કરવો પડ્યો હતો. પાલિકા અને પોલીસની નબળી કામગીરી ના કારણે હવે માથાભારે દબાણ કરનારા જાહેર મિલ્કતોને બાપીકી મિલકત સમજીને દબાણ કરી રહ્યાં છે. જો પાલિકા કે પોલીસે બ્રિજ પર મુકાયેલા CCTV કેમેરાનું પ્રમાણિકતાથી મોનીટરીંગ કર્યું હોત તો જાહેર બ્રિજ પર આવા પ્રકારના દબાણ કરવું શક્ય ન હતું.
