ડમ્પર
ચાલક સહિત ત્રણ શખ્સ સામે ફરજમાં રૃકાવટ અને ધમકી અંગે ફરિયાદ
વઢવાણના
મેમકા-ઝાંપોદર રોડ પર ગેરકાયદે બ્લેક ટ્રેપ ભરેલ ડમ્પરનો પીછો કરતા અધિકારીની
ગાડીને નુકસાન પહોંચાડી ડમ્પર ચડાવી મારી નાંખવાની ધમકી આપી
સુરેન્દ્રનગર –
સુરેન્દ્રનગર જિલ્લામાં ભૂમફિયાઓને તંત્ર કે કાયદાનો પણ ડર ન
હોય તેમ લાગી રહ્યું છે અને દિન પ્રતિદિન તંત્રની ટીમો પર હુમલો અને ફરજમાં રૃકાવટ
સહિતના બનાવો વધી રહ્યા છે. ત્યારે સતત બીજે દિવસે ગેરકાયદેસર ખનીજ સંપત્તિનું ચેકીંગ
કરવા ગયેલ ખાણ ખનીજ વિભાગની ટીમને વઢવાણ તાલુકાના ગ્રામ્ય વિસ્તારમાં જાનથી મારી નાંખવાની
ધમકી અને ખાનગી ગાડીને નુકશાન પહોંચાડવાનો બનાવ બનતા વઢવાણ પોલીસ મથકે ત્રણ શખ્સો સામે
ફરિયાદ નોંધાવતા પોલીસે વધુ તપાસ હાથ ધરી છે.
સુરેન્દ્રનગર
જિલ્લા ખાણ ખનિજ વિભાગમાં ફરજ બજાવતા રોયલટી ઇન્સ્પેકટર હિરેનકુમાર સંડેરા ટીમના સિકયુરિટી
ગાર્ડ સહિતનાઓ ખાનગી ગાડીમાં ગેરકાયદે ખનીજ ચોરી અંગે સરપ્રાઈઝ ચેકિંગ અને રેઇડ કરવા
ગયા હતા. જે દરમિયાન મેમકા-ઝાંપોદર રોડ પર ગેરકાયદે બ્લેક ટ્રેપ ભરેલ ડમ્પરને ઉભુ રાખવાનો
પ્રયાસ કરતા ડમ્પર ચાલકે ડમ્પર ઉભું નહીં રાખતા ટીમે તેનો પીછો કર્યો હતો.
આ
સમયે અન્ય એક કારમાં આવેલા બે શખ્શે પણ ખાણ ખનીજ વિભાગની ગાડીને ઓવરટેક કરવા દીધી
નહોતી અને ફરજમાં રૃકાવટ ઉભી કરી હતી. તેમજ ટીમની ખાનગી ગાડીના દરવાજાને નુકસાન
પહોંચાડી ડમ્પરનો પીછો નહીં કરવાની અને ડમ્પર માથે ચડાવી જાનથી મારી નાંખવાની ધમકી
આપી હતી. જે અંગે ભોગ બનનાર રોયલ્ટી ઇન્સ્પેકટર એ વઢવાણ પોલીસ મથકે ડમ્પરના ચાલક, અન્ય કાર ચાલક અને
કારમાં બેઠેલ એક વ્યક્તિ સહિત ફૂલ ૦૩ શખ્સો સામે જાનથી મારી નાંખવાની ધમકી અને
ફરજમાં રૃકાવટ અંગેની વઢવાણ પોલીસ મથકે ફરિયાદ નોંધાવતા પોલીસે વધુ તપાસ હાથ ધરી
છે.
અત્રે
ઉલ્લેખનીય છે કે થાન તાલુકાના ભડુલા ગામે ભૂમાફિયાઓ દ્વારા નાયબ મામલતદાર અને ટીમ
પર હુમલાના બનાવની હજુ શાહી સુકાઈ નથી ત્યાં વઢવાણ તાલુકામાં પણ ભૂમાફિયાઓ દ્વારા
ખાણ ખનીજ વિભાગની ટીમને જાનથી મારી નાંખવાની ધમકીનો બનાવ બનતા ચકચાર મચી જવા પામી
છે.
