જિલ્લામાં વધતી દારૂની હેરાફેરી વચ્ચે
પોલીસે ત્રણ મહિલાઓ સહિત પાંચને પકડીને ૧.૦૪ લાખ રૂપિયાનો મુદ્દામાલ જપ્ત કરી લીધો
ગાંધીનગર: ગાંધીનગર જિલ્લામાં વધતી જતી દારૂની હેરાફેરી વચ્ચે એલસીબી દ્વારા સેક્ટર ૨૮માં વિદેશી દારૂના જથ્થા સાથે માતા પુત્રને પકડી લેવામાં આવ્યાં હતાં ત્યારે ચિલોડા પોલીસ દ્વારા મહુન્દ્રામાં પણ રિક્ષામાં બિયરનો જથ્થો લઈ જતા અમદાવાદની બે મહિલા સહિત ત્રણને પકડીને કુલ ૧.૦૪ લાખનું મુદ્દામાલ જપ્ત કરવામાં આવ્યો છે.
રાજ્યમાં દારૂબંધી હોવા છતાં પર પ્રાંતમાંથી મોટા પ્રમાણમાં વિદેશી દારૂનો જથ્થો ઘુસાડવામાં આવી રહ્યો છે ત્યારે પોલીસ પણ આવા દારૂને પકડવા માટે મથી રહી છે. આ સ્થિતિમાં ગાંધીનગર એલસીબીની ટીમ પેટ્રોલિંગમાં હતી તે દરમિયાન બાતમી મળી હતી કે સેક્ટર ૨૮ આદીવાડામાં રહેતી મહિલા બુટલેગર રેખા અશ્વિન દંતાણી રિક્ષામાં તેના પુત્ર સાથે વિદેશી દારૂનો જથ્થો રાખીને ઘર તરફ જવાની છે. જે બાતમીના આધારે પોલીસ ટીમ દ્વારા સેક્ટર ૨૭-૨૮ ચાર રસ્તા પાસે વોચ ગોઠવવામાં આવી હતી અને બાતમીવાળી રીક્ષાને ઉભી રાખવામાં આવતા તેમાં રેખા દંતાણી અને તેનો પુત્ર હાજર મળી આવ્યા હતા. રિક્ષામાં તપાસ કરતા વિદેશી દારૂની નાની મોટી ૧૯૦ બોટલ મળી આવી હતી. જેથી રીક્ષા અને દારૂ મળીને ૯૬ હજારનો મુદ્દામાલ જપ્ત કરી લેવામાં આવ્યો હતો. બીજી બાજુ ચિલોડા પોલીસ દ્વારા પણ મહુન્દ્રા પાટીયા પાસે બાતમીના આધારે વોચ ગોઠવવામાં આવી હતી અને રિક્ષામાં અમદાવાદની કાજલ મેહુલભાઈ માછરેધર, ઉષા પપ્પુભાઈ નાયર અને જીગર નંદલાલ ઇન્દ્રકરને ઝડપી લેવામાં આવ્યા હતા તેમની રિક્ષામાં તપાસ કરવામાં આવતા બિયરના ૩૫ જેટલા ટીન મળી આવ્યા હતા. જેથી તેમની સામે પણ પ્રોહિબિશન એક્ટ મુજબ ગુનો દાખલ કરીને તપાસ શરૂ કરવામાં આવી હતી.
