મુંબઈ : મુંબઈ ઝવેરી બજારમાં આજે શનિવારના કારણે બુલિયન બજાર સત્તાવાર બંધ રહી હતી. જો કે બંધ બજારે સોના-ચાંદીના ભાવમાં વિશ્વ બજાર પાછળ તેજી આગળ વધી હતી. મુંબઈ કરન્સી બજારમાં પણ આજે બંધ બજારે રૂપિયા સામે ડોલરના ભાવ આંચકા પચાવી ફરી વધી આવ્યાના નિર્દેશો મળ્યા હતા. વિશ્વ બજારમાં સોનાના ભાવ ઔંશના ૪૩૨૫થી ૪૩૨૬ ડોલરવાળા વધી છેલ્લે સપ્તાહના અંતે ૪૩૩૮થી ૪૩૩૯ ડોલર રહ્યાના સમાચાર મળ્યા હતા.
સોના પાછળ વૈશ્વિક ચાંદીના ભાવ પણ ઔંશના ૬૫.૮૪થી ૬૫.૮૫ ડોલર વાળા ઝડપી વધી ઉંચામાં ૬૭ ડોલરની રેકોર્ડ સપાટી વટાવી છેલ્લે ભાવ સપ્તાહના અંતે ૬૭.૧૫થી ૬૭.૧૬ ડોલર રહ્યા હતા. દરમિયાન, મુંબઈ બુલિયન બજારમાં આજે સોનાના ભાવ જીએસટી વગર ૧૦ ગ્રામના ૯૯૫ના રૂ.૧૩૧૨૫૧ વાળા રૂ.૧૩૧૫૦૦ બોલાઈ રહ્યા હતા. જ્યારે ૯૯૯ના ભાવ રૂ.૧૩૧૭૭૯ વાળા રૂ.૧૩૨૦૦૦ રહ્યા હતા.
મુંબઈ ચાંદીના ભાવ કિલોદીઠ જીએસટી વગર રૂ.૨૦૦૦૬૭ વાળા આજે વધી રૂ.૨૦૩૨૫૦ રહ્યા હતા. અમદાવાદ ઝવેરી બજારમાં આજે સોનાના ભાવ રૂ.૫૦૦ વધી ૯૯૫ના રૂ.૧૩૧૫૦૦ તથા ૯૯૯ના રૂ.૧૩૨૦૦૦ રહ્યા હતા. જ્યારે અમદાવાદ ચાંદીના ભાવ બે લાખ રહ્યા હતા.
દરમિયાન, વિશ્વ બજારમાં વિવિધ પ્રમુખ કરન્સીઓ સામે ડોલરનો વૈશ્વિક ઈન્ડેક્સ નીચામાં ૯૮.૪૨ રહ્યા પછી વધી ઉંચામાં ૯૮.૭૫ થઈ છેલ્લે સપ્તાહના અંતે ૯૮.૭૨ રહ્યાના નિર્દેશો હતા. મુંબઈ કરન્સી બજારમાં રૂપિયા સામે ડોલરના ભાવ ઘટતા અટકી રૂ.૮૯.૨૭ વાળા વધી રૂ.૮૯.૫૯ થી ૮૯.૬૦ આસપાસ છેલ્લે સપ્તાહના અંતે બોલાઈ રહ્યા હતા.
અમેરિકાના ફુગાવામાં વૃદ્ધી અપેક્ષાથી ધીમી આવ્યાના સમાચાર હતા તથા ત્યાં બેરોજગારીના દાવાઓ વધી ૨ લાખ ૩૬ હજાર આવવ્યાના નિર્દેશો હતા. આની અસર વૈશ્વિક ડોલર પર દેખાઈ હતી.
દરમિયાન, વિશ્વ બજારમાં કોપરના ભાવ વધુ વધી છેલ્લે ૧.૩૩ ટકા પ્લસમાં રહ્યા હતા. પ્લેટીનમના ભાવ ઔંશના ૧૯૨૩થી ૧૯૨૪ વાળા વધુ વધી છેલ્લે ૧૯૭૪થી ૧૯૭૫ ડોલર રહ્યા હતા જ્યારે પેલેડીયમના ભાવ ૧૬૭૫થી ૧૬૭૬ વાળા વધી છેલ્લે ૧૭૧૩થી ૧૭૧૪ ડોલર રહ્યા હતા.
