જામનગર, મોરબી, હરિપર, મોટાદડવામાં દરોડા
રૂા. 3 લાખથી વધુની રોકડ રકમ, મોબાઇલ ફોન અને વાહન સહિતનો મુદ્દામાલ કબજે લઈને પોલીસ દ્વારા કાર્યવાહી
રાજકોટ: સૌરાષ્ટ્રમાં જુગારની બદીને નેસ્તનાબૂદ કરવા પોલીસ તંત્ર દરોડાઓ પાડી રહ્યું છે. આજે જામનગર, મોરબી, લાલપુર તાલુકાના હરીપર, ગોંડલના મોટા દડવામાં પોલીસે જુગાર દરોડા પાડી રૂા.૩ લાખથી વધુની રોકડ રકમ, મોબાઇલ ફોન અને વાહનો સહિત કુલ ૩૦ પત્તાપ્રેમીઓને પકડી પાડયા છે જેમાં ૧૩ મહિલાઓનો સમાવેશ થાય છે.
જામનગરની લોકલ ક્રાઇમ બ્રાન્ચ ટીમે લાલપુર તાલુકાના હરીપર ગામમાં જુગારનો દરોડો પાડયો હતો. ત્યાંથી ગંજીપાના વડે જુગાર રમી રહેલા ૬ શખ્સોની અટકાયત કરી રૂપિયા ૧,૫૫,૫૦૦ની રોકડ રકમ, ૬ નંગ મોબાઇલ ફોન અને એક ઇકો કાર સહિત રૂપિયા ૪,૮૫,૫૦૦ની માલમતા કબજે કરી છે.
જુગાર અંગેનો બીજો દરોડો જામનગરના સીટી.બી.ડિવિઝનના પોલીસ સ્ટાફે ક્રિષ્ના પાર્ક શેરી નંબર-૨માં જીતુભા ગોવુભા જાડેજાના મકાન પર દરોડો પાડયો હતો, અને મકાનની અંદર ગંજીપાના વડે જુગાર રમી રહેલી પાંચ મહિલાઓ તેમજ અન્યોની અટકાયત કરી તેઓ પાસેથી રૂપિયા એક લાખની રોકડ રકમ અને જુગારનું સાહિત્ય કબજે કર્યું છે.
જુગાર અંગેનો ત્રીજો દરોડો જામનગરમાં શંકર ટેકરી નવા નિશાળ પાસે પાડવામાં આવ્યો હતો. ત્યાંથી જાહેરમાં ગંજીપાના વડે જુગાર રમી રહેલાં ચારની અટકાયત કરી રૂપિયા ૧૦,૦૫૦ની રોકડ રકમ અને જુગારનું સાહિત્ય કબજે કર્યું છે.
મોટા દડવા ગામે ઉમરાણી ગામે જવાના રસ્તે સોનારિયા નામે ઓળખાતી સીમમાં ડુંગરનાં પટમાં જુગાર રમવાની બાતમી મળતાં આટકોટ પોલીસે રેઇડ કરી જુગાર રમતી ૩ મહિલા સહિત ૮ ને રૂા.૧૭,૪૭૦ સાથે પકડી લીધા હતા.
