સૌરાષ્ટ્રમાં મેઘ – આડંબર વચ્ચે 34 તાલુકામાં ધીમી મેઘમહેર | Cloudy weather in Saurashtra light rain i…

ચાર દિવસથી ઘટાટોપ વાદળોને કારણે ઠંડક પ્રસરી 

સૌથી વધુ મોરબી, ટંકારા અને માળિયા મિંયાણા પંથકમાં ૨ ઇંચ તો રાજકોટ, લોધિકા, હળવદ, વાંકાનેર, જસદણ સહિત 12 તાલુકામાં 1 ઇંચ વરસાદ

રાજકોટ: સૌરાષ્ટ્રમાં આજે ચોથા દિવસે પણ મેઘ-અડંબર વચ્ચે ૩૪ તાલુકામાં ધીમીધારે ઝાપટાંથી બે ઇંચ મેઘમહેર વરસી હતી. અવિરત ઘટાટોપ વાદળો છવાયેલા રહેવાથી હવે વાતાવરણમાં ઠંડકનો અહેસાસ થઇ રહ્યો છે. ભાદરવા મહિનામાં ખરાં સમયે વરસાદ વરસવાથી ચિંતાના વાદળો વિખેરાયા છે અને પાક – પાણીનું ચિત્ર ઉજળું બન્યું છે. 

સૌરાષ્ટ્રમાં ગઇકાલે મધરાતથી ઝરમર વરસાદ ચાલુ થયો હતો, જે આજે પણ હળવા – ભારે ઝાપટા સાથે યથાવત  રહ્યો હતો. મોરબી જિલ્લામાં ગત રાત્રે અડધાથી એક ઇંચ જેવો વરસાદ વરસ્યા બાદ આજે પણ દિવસ દરમિયાન મોરબી, ટંકારા અને માળિયા મિંયાણામાં બે ઇંચ વરસાદ પડયો હતો. જ્યારે હળવદ અને વાંકાનેરમાં એક ઇંચ વરસાદ નોંધાયો હતો. અવિરત વરસાદથી આજે મચ્છુ – ૧ ડેમ ઓવરફલો થયો હતો.

રાજકોટ જિલ્લામાં ગઇકાલ બાદ આજે પણ છૂટા-છવાયા ઝાપટા ચાલું રહ્યા હતા. સાંજે સુધીમાં રાજકોટ, લોધિકા, જસદણ, વિંછીયાઅને કોટડાસાંગાણીમાં એક ઇંચ તો પડધરીમાં અડધો ઇંચ વરસાદ વરસતા માર્ગો પાણી – પાણી થઇ ગયા હતા. 

સૌરાષ્ટ્રમાં અન્યત્ર આજે બાબરામાં એક ઇંચ તો વડિયા, લાઠી અને લીલીયામાં અડધો ઇંચ વરસાદ નોંધાયો હતો. જ્યારે અન્ય શહેરી – ગ્રામ્ય વિસ્તારમાં  ૫ – ૭ મી.મી. સુધીના હળવા – ભારે ઝાપટા વરસ્યા હતા.