વડોદરા,પાણીગેટ રાજારાણી તળાવ પાસે ચાલતા જુગારધામ પર સ્ટેટ મોનિટરિંગ સેલની ટીમે દરોડો પાડતા શહેર પોલીસ ઊંઘતી ઝડપાઇ છે. એક તરફ દારૃના ઉપરાછાપરી કેસ કરતી પોલીસ વર્ષોથી એક જ સ્થળે વારંવાર ચાલતા જુગારધામ તરફ નિષ્ક્રિય રહી હતી. જેના પગલે શહેર પોલીસની નિષ્ક્રિયતા છતી થઇ છે.
દિવાળી નજીક આવતા જ શહેર પોલીસે દારૃ વેચતા બૂટલેગરો સામે કાર્યવાહી હાથ ધરી છે. ત્યારે બીજી તરફ સ્ટેટ મોનિટરિંગ સેલની ટીમે જુગાર ધામ પર દરોડો પાડતા ચકચાર મચી ગઇ છે. સ્ટેટ મોનિટરિંગ સેલની ટીમને માહિતી મળી હતી કે, પાણીગેટ રાજારાણી તળાવ નજીક ખુલ્લા મેદાનમાં કેટલાક લોકો જુગાર રમાડી રહ્યા છે. જેથી, પોલીસે ઉપરોક્ત સ્થળે જઇને રેડ કરતા ૧૨જુગારીઓ રંગેહાથે ઝડપાઇ ગયા હતા. જ્યારે મુખ્ય સૂત્રધાર સહિત ૨૨ આરોપીઓને વોન્ટેડ જાહેર કરવામાં આવ્યા છે. પોલીસે રોકડા ૨.૫૫ લાખ, ૧૪ મોબાઇલ ફોન અને ૧૮ વાહનો સહિત ૭.૭૧ લાખનો મુદ્દામાલ કબજે કર્યો છે. જ્યારે જુગારધામના સંચાલક (૧) હુસેન ઉસ્માનખાન પઠાણ (૨) અફઝલખાન ઉર્ફે અન્નુ ઉસ્માનખાન પઠાણ (બંને રહે. કલ્યાણ નગર, અજબડી મિલ) (૩) સંદિપ રાજુભાઇ રાજપૂત (રહે. બાબુભાઇની ચાલી, ડભોઇ રોડ) (૪) મનુ (રહે. અજબડી મિલ પાસે) (૫) ચંદુ ઉર્ફે ચુલબુલ (રહે. ગોરવા) સહિત ૨૨ ને વોન્ટેડ જાહેર કરવામાં આવ્યા છે. બાકીના વોન્ટેડ આરોપીઓને તેમના વાહન નંબરના આધારે શોધવામાં આવી રહ્યા છે. ઉલ્લેખનીય છે કે, રેડના પગલે પાણીગેટ પી.આઇ. એ.બી. પટેલ સામે ખાતાકીય તપાસનો હુકમ પોલીસ કમિશનર દ્વારા કરવામાં આવ્યો છે.
દિવાળી આવતા જ બાતમીદારોને નેટવર્ક માટે એસ.એમ.સી. અને શહેર પોલીસ વચ્ચે હોડ
વડાદરા,
દિવાળી સામે આવતા જ શહેર પોલીસ અને સ્ટેટ મોનિટરિંગ સેલની ટીમ વચ્ચે બાતમીદારોના નેટવર્કને પોતાના તરફ કરવાની હોડ ચાલી રહી હોવાનું ચર્ચાઇ રહ્યું છે. શહેર પોલીસે દારૃના ધંધા તરફ લાલ આંખ કરી તો સ્ટેટ મોનિટરિંગ સેલની ટીમે જુગારનો કેસ કર્યો છે. જેની પાછળ એક વોન્ટેડ આરોપીનું નામ ચર્ચાઇ રહ્યું છે.
વડોદરા,
સ્ટેટ મોનિટરિંગ સેલની ટીમે દરોડો પાડી ૧૨ જુગારીઓને ઝડપી પાડયા હતા. તેમાં ગુનાનું સ્થળ ડીસીબી ઓફિસની પાછળ,પાણીગેટ રાજારાણી તળાના કિનારે ગોપાલ કારાભાઇ વાઘેલાના ઘરની પાછળ , અજબડી મિલ દર્શાવ્યું છે. જોકે, ડીસીબીની ઓફિસ ઘટના સ્થળથી દૂર છે. જેના કારણે શહેર પોલીસ અને સ્ટેટ મોનિટરિંગ સેલની ટીમ વચ્ચે ઘર્ષણ હોવાની ચર્ચા થઇ રહી છે.
