Mukesh Sahni: બિહાર વિધાનસભા ચૂંટણીના હાલના વલણો સ્પષ્ટપણે દર્શાવે છે કે નીતિશ કુમારના નેતૃત્વમાં NDA ફરી એકવાર બિહારમાં સરકાર બનાવશે. બીજી તરફ, મહાગઠબંધન તેના મહત્ત્વપૂર્ણ દાવાઓથી વિપરીત ખૂબ જ નબળું પ્રદર્શન કરી રહ્યું છે. મહાગઠબંધનની સહયોગી પાર્ટીઓની સ્થિતિ અત્યંત દયનીય છે, જેમાં મુકેશ સાહનીની VIP પાર્ટી તો એક પણ બેઠક જીતી શકી નથી.
મહાગઠબંધન તરફથી નાયબ મુખ્યમંત્રી પદના ઉમેદવાર તરીકે રજૂ કરાયેલા મુકેશ સાહનીની પાર્ટીના આ નબળા દેખાવે તેમના રાજકીય ભવિષ્ય પર મોટો પ્રશ્નાર્થ ચિહ્ન મૂકી દીધો છે.
મુકેશ સાહનીની પ્રતિક્રિયા
બિહાર વિધાનસભા ચૂંટણીમાં મહાગઠબંધનનો એક મહત્ત્વપૂર્ણ હિસ્સો રહેલા VIP (વિકાસશીલ ઇન્સાન પાર્ટી)ના પ્રમુખ અને પ્રખ્યાત ઉદ્યોગપતિ મુકેશ સાહનીનું નિવેદન સામે આવ્યું છે. પરિણામ બાદ તેમણે કહ્યું છે કે, ‘વિચાર્યું નહોતું કે આવું થશે, છતાં અમે લોકમત (જનાદેશ)નું સંપૂર્ણ સન્માન કરીએ છીએ. જે લૂંટફાટની ઘટનાઓ અગાઉ રાત્રિના અંધારામાં થતી હતી, તે હવે ખુલ્લેઆમ થઈ રહી છે.’
મુકેશ સાહનીએ NDAને આગ્રહ પણ કર્યો. તેમણે કહ્યું કે, જે કહીને NDAએ મત લીધા છે, હવે તેઓ કરીને બતાવે. સાહનીએ આરોપ લગાવ્યો કે NDAએ આ મત માતાઓ-બહેનોને ફોસલાવીને લીધા છે. ચૂંટણી પહેલા 10 હજાર રૂપિયા મહિલાઓના ખાતામાં આપવામાં આવ્યા. કહેવાયું હતું કે જીત બાદ એક લાખ 90 હજાર રૂપિયા આપવામાં આવશે. હવે NDAને તેમાં પારદર્શકતા દેખાડવી પડશે.
આ પણ વાંચો: VIDEO: ચેન્નઈ નજીક ટ્રેનિંગ સમયે વાયુસેનાનું વિમાન ક્રેશ, જાનહાનિ નહીં
ચૂંટણી વલણોમાં સાંજે 5 વાગ્યા સુધીમાં NDA 203 બેઠકો પર આગળ ચાલી રહી છે. જ્યારે મહાગઠબંધન માત્ર 34 બેઠકો પર જ પોતાની લીડ બનાવી શક્યું છે. લોકસભા ચૂંટણીની જેમ આ વખતે બિહારની જનતા મહાગઠબંધનની વાતો સાથે સહમત થતી જોવા મળી નથી.
બિહાર વિધાનસભા ચૂંટણી 2025માં છેલ્લા 63 વર્ષનો રેકોર્ડ તૂટ્યો અને રાજ્યમાં 67% મતદારો સરકારની પસંદગી કરવા માટે મતદાન કેન્દ્ર સુધી પહોંચ્યા. પરંતુ, સૌથી વધુ આશ્ચર્યની વાત એ છે કે આમાં મહિલાઓના મતદાનની ટકાવારી 71% જેટલી રહી છે, જે એક નવો રેકોર્ડ છે. જ્યારે પુરુષોનું મતદાનનું પ્રમાણ આનાથી લગભગ 10% જેટલું ઓછું રહ્યું છે.
