– જિલ્લાના ત્રાપજ સ્થિત આરોગ્ય કેન્દ્રમાં
– ડિસેમ્બરમાં એક્સપાયર થઈ ત્યાં સુધી કેમ ઉપયોગ ન કર્યો કે અન્ય કેન્દ્રને શા માટે ફાળવણી ન કરી તે અંગે ફાર્માસિસ્ટ-સ્ટાફ નર્સનો ખૂલાસો પૂછાશે
ભાવનગર : ભાવનગર જિલ્લાના ત્રાપજ સ્થિત આરોગ્ય કેન્દ્રમાં હડકવા વિરોધી રસીના એક્સપાયર થયેલા ૪૦ વાઈલ મળી આવતા આવતીકાલ તા.૨૯ને શનિવારે ફાર્માસિસ્ટ અને સ્ટાફ નર્સને શો-કોઝ આપી ખૂલાસો પૂંછાશે.
આ અંગેની પ્રાપ્ય વિગત અનુસાર જિલ્લા પંચાયતના વિપક્ષના નેતાએ જિલ્લા આરોગ્ય અધિકારીને કરેલી રજૂઆતમાં જણાવ્યું હતું કે, જિલ્લાના ત્રાપજ આયુષ્યમાન આરોગ્ય સેન્ટર ખાતે જિલ્લા યુવક કોંગ્રેસના ઉપપ્રમુખ ગયા ત્યારે શ્વાન કરડવાના કિસ્સાઓમાં વ્યક્તિને હડકવા ન થાય તે હેતુથી આરોગ્ય કેન્દ્રો દ્વારા વેક્સિન આપવામાં આવે છે. પરંતુ ત્રાપજ આરોગ્ય કેન્દ્રમાં આ વેક્સિનના એક્સપાયર થયેલા ડોઝ હોવાનું ખૂલ્યું છે. આ ગંભીર બાબત છે અને દર્દી સાથે જીવલેણ ચેડા કર્યાની બાબત છે. શું જિલ્લાના તમામ પીએચસી અને સીએચસી (આરોગ્ય કેન્દ્રો)માં પણ આવી જ દવાઓ આપવામાં આવતી હશે ? હડકવા એ ચેપી અને જીવલેણ રોગ છે ત્યારે આવી બાબતોમાં કાળજી ન લેવાતી હોય તો બીજી આરોગ્યની બાબતમાં શું સાવચેતી રાખતી હશે ? એવા વેધક પ્રશ્ન ઉઠાવી તેમણે ૭ દિવસમાં તમામ પીએચસી અને સીએચસીમાં એક્સપાયર થઈ ગયેલી દવાઓના સ્ટોકને ડેડ સ્ટોક કરી સ્ટોરમાંથી દૂર કરવામાં આવે તથા જિલ્લામાં દાખલો બેસાડવા જવાબદાર સામે શિક્ષાત્મક પગલા લેવા માંગ કરી હતી.
દરમિયાનમાં, આ બનાવના પગલે આરોગ્ય વિભાગની ટીમ આજે ત્રાપજ આરોગ્ય કેન્દ્રમાં તપાસાર્થે પહોંચી હતી. જેમાં હડકવા વિરોધી રસીના એક્સપાયર થઈ ગયેલ હોય તેવા ૪૦ વાઈલ મળી આવ્યા હતા. જેના અનુસંધાને આરોગ્ય વિભાગ દ્વારા ત્રાપજ આરોગ્ય કેન્દ્રના ફાર્માસિસ્ટ અને સ્ટાફ નર્સને શો-કોઝ અપાશે. વેક્સિન ડિસેમ્બર-૨૦૨૪માં એક્સપાયર થઈ ત્યાં સુધી કેમ ઉપયોગ ન કર્યો કે અન્ય કેન્દ્રને શા માટે ફાળવણી ન કરી ? એટલું જ નહીં, આ રકમની તેમની પાસેથી વસુલાત કેમ ન કરવી ? તે અંગે ફાર્માસિસ્ટ અને સ્ટાફ નર્સનો ખૂલાસો પૂછાશે.
એક્સપાયર થયેલ વેક્સિન કોઈને અપાઈ નથી : સીડીએચઓ
મુખ્ય જિલ્લા આરોગ્ય અધિકારી (સીડીએચઓ)એ જણાવ્યું હતું કે, જે ૪૦ વાઈલ મળ્યા છે તે ડિસેમ્બર-૨૦૨૪માં એક્સપાયર થઈ ગયા હતા. પરંતુ આ વેક્સિન કોઈને આપવામાં આવેલ નથી. સરકારે આ વેક્સિનની બે વર્ષ પૂર્વે સપ્લાઈ કરેલ હતી. નવી જે ફાળવણી થઈ તે વપરાઈ પરંતુ જૂનો જથ્થો પડયો રહ્યો હતો.
