વડોદરા, તા.14 હરણીરોડ પર બીમાર કાકાની ખબર જોવા માટે જતી મહિલાને પૂરપાટઝડપે જતી એક ટ્રકે ટક્કર મારતા મહિલાનું કરૃણ મોત નિપજ્યું હતું.
આ અંગેની વિગત એવી છે કે ગોધરાના મૂળ રહીશ પરંતુ હાલ વારસિયા વિસ્તારમાં જૂના આરટીઓ પાસે રવિધારા એપાર્ટમેન્ટમાં રહેતા મીનાબેન (ઉ.વ.૪૫)ને તેમના પતિ શ્યામકુમાર સવારે એક્ટિવા પર બેસાડી ઘેરથી નીકળી વારસિયા ઝુલેલાલ મંદિર પાસે ઉતારી પોતે નોકરી પર ગયા હતાં. ત્યારબાદ મીનાબેન ઝુલેલાલ મંદિરથી ચાલતા ચાલતા હરણી ખાતે રહેતા બીમાર કાકાની તબિયત જોવા માટે જતા હતાં.
દરમિયાન હરણીરોડ પર અશોકા પબ્લિક સ્કૂલ પાસે પૂરપાટઝડપે જતી એક ટ્રકે મીનાબેનને જોરદાર ટક્કર મારતા તેઓ રોડ પર લોહીલુહાણ હાલતમાં પડયા હતાં. તેમને તાત્કાલિક સયાજી હોસ્પિટલમાં લઇ જતા ફરજ પરના તબીબોએ તેમનું મૃત્યુ થયું હોવાનું જાહેર કર્યુ હતું. પત્નીને અકસ્માત થયો હોવાની જાણ થતાં જ શ્યામકુમાર હોસ્પિટલમાં દોડી ગયા હતાં. હોસ્પિટલમાં અકસ્માત કરનાર ટ્રકનો ચાલક પણ હાજર હતો અને તેણે મારાથી અકસ્માત થયો છે મારી ભૂલ થઇ ગઇ છે તેમ પણ કહ્યુ હતું. જો કે બાદમાં ચાલક હોસ્પિટલમાંથી ફરાર થઇ ગયો હતો. બનાવ અંગે હરણી પોલીસે ગુનો નોંધી વધુ તપાસ હાથ ધરી છે.
