વડોદરા,માંજલપુરના ઇવા મોલના સ્વિપર દ્વારા મોલમાં માતા સાથે આવેલી ૧૦ વર્ષની બાળકી સાથે શારીરિક છેડછાડ કરતા માંજલપુર પોલીસે ગુનો દાખલ કરી કાયદેસરની કાર્યવાહી હાથ ધરી છે.
માંજલપુર વિસ્તારમાં રહેતી પરિણીતા તેના પરિવાર સાથે ગઇકાલે માંજલપુર ઇવા મોલમાં ડિનર માટે ગઇ હતી. તેમની ૧૦ વર્ષની બાળકી મોલમાં ગેલેરીમાં ત્રીજા માળે આવેલા કોમન બાથરૃમની ગેલેરીમાં ફ્રેશ થવા માટે ગઇ હતી. તે સમયે ત્યાં હાજર મોલનો સ્વિપરે તેની સાથે હાથ મિલાવ્યો હતો. ત્યારબાદ બાળકી ફરીથી આવતા તેણે પૂછ્યું કે, તું જમી કે નહીં ?ત્યારબાદ ચોથી વખત બાળકી આવતા સ્વિપરે તેના ગાલ પર ચુંબન કર્યુ હતું. જે અંગે બાળકીના પરિવારને જાણ થતા તેમણે પોલીસને કોલ કર્યો હતો. પોલીસે સ્થળ પર જઇને કાર્યવાહી હાથ ધરી હતી. બાળકીની માતાની ફરિયાદના આધારે પોલીસે ગુનો દાખલ કરી આરોપી પારસ દિલીપસિંહ પરમાર (રહે. સોના પાર્ક, માંજલપુર) ની ધરપકડ કરી હતી. ખરેખર શું ઘટના બની હતી ?તેની માહિતી મેળવવા પોલીસે મોલમાં ફિટ કરેલા સીસીટીવીના ફૂટજેની ચકાસણી હાથ ધરી છે. આરોપીએ ખરેખર બાળકીની સાથે ખરાબ ઇરાદાથી આ કૃત્ય કર્યુ હતું કે, પછી તેનો ઇરાદો ખરાબ નહતો. જે અંગે પોલીસ તપાસ કરી રહી છે.
