Heavy Rain Forecast: ગુજરાતના અનેક જિલ્લામાં મેઘરાજાએ ધમાકેદાર બેટિંગ શરૂ કરી છે. જેના કારણે મોટા શહેરોમાં ભારે વરસાદથી ઠેર ઠેર પાણી ભરાયા છે અને જનજીવન પ્રભાવિત થયું છે. આ દરમિયાન હવામાન વિભાગે આજે (28મી જુલાઈ) બપોરે 1થી સાંજના 4 વાગ્યા સુધી રાજ્યના ત્રણ જિલ્લામાં રેડ એલર્ટ અને 17 જિલ્લામાં વરસાદનું ઓરેન્જ એલર્ટ જાહેર કર્યું છે.
હવામાન વિભાગની આગાહી
હવામાન વિભાગના Nowcast અનુસાર, સોમવારે (28મી જુલાઈ) બપોરે 1 વાગ્યાથી સાંજના 4 વાગ્યા સુધીમાં પંચમહાલ, દાહોદ અને છોટાઉદેપુરમાં રેડ એલર્ટ જાહેર કર્યું છે. જ્યારે સાબરકાંઠા, અરવલ્લી, મહિસાગર, ખેડા, આણંદ, વડોદરા, ભરૂચ, સુરત, નર્મદા, તાપી, ડાંગ, અમદાવાદ, સુરેન્દ્રનગર, બોટાદ, ભાવનગર, રાજકોટ, અને જામનગરમાં વરસાદનું ઓરેન્જ એલર્ટ જાહેર કરાયું છે.
છેલ્લા 24 કલાકમાં 198 તાલુકામાં વરસાદ
છેલ્લા 24 કલાકમાં રાજ્યના 198 તાલુકામાં વરસાદ નોંધાયો છે. જેમાં સૌથી વધુ ખેડાના નડિયાદમાં 10.43 ઈંચ વરસાદ ખાબક્યો હતો. જ્યારે અમદાવાદના દસ્ક્રોઈમાં 10.35 ઈંચ, મહેમદાવાદ 9.37 ઈંચ, માતરમાં 8.03 ઈંચ, મહુધામાં 7.05 ઈંચ, વાસોમાં 6.22 ઈંચ, કઠલાલમાં 5.31 ઈંચ, ઉમરેઠમાં 5.28 ઈંચ, સાણંદમાં 4.96 ઈંચ અને ખેડામાં 4.96 ઈંચ નોંધાયો છે.
ગુજરાતના જળાશયોની સ્થિતિ
ગુજરાતમાં ભારે વરસાદથી 29 જળાશયો હાલ 100 ટકા ભરાઈ ગયા છે. જેમાં કચ્છના સૌથી વધુ 5, ભાવનગરના 4, સુરેન્દ્રનગરના 3 જળાશયનો સમાવેશ થાય છે. 62 જળાશયોમાં 70 ટકાથી 100 ટકા, 38 જળાશયોમાં 25 ટકાથી 50 ટકા જળસ્તર છે. હજુ પણ 36 જળાશયો એવા છે જ્યાં જળસ્તર 25 ટકાથી નીચું છે. હાલ ગુજરાતના 49 જળાશયમાં જળસ્તર 90 ટકાથી વધુ હોવાથી હાઇએલર્ટ હેઠળ મૂકવામાં આવ્યા છે. 21 જળાશયો એલર્ટ અને 21 જળાશયો વોર્નિંગ હેઠળ છે.
