અમદાવાદ : નાણાકીય વર્ષ ૨૦૨૫ કરતાં નાણાકીય વર્ષ ૨૦૨૬માં લોન વૃદ્ધિ નજીવી વધીને ૧૩ થી ૧૩.૫ ટકા થશે. જોકે, નોન-બેંકિંગ ફાઇનાન્શિયલ કંપનીઓ (એનબીએફસી) અને રિટેલ ક્ષેત્રને ધિરાણમાં સતત મંદી સાથે લોનની રચનામાં ફેરફાર થવાની ધારણા છે તેમ ઇન્ડિયા રેટિંગ્સ એન્ડ રિસર્ચ (ઇન્ડ-રા)એ જણાવ્યું હતું.
રેટિંગ એજન્સીને અપેક્ષા છે કે આ ઘટાડો ખાનગી મૂડી ખર્ચ દ્વારા સરભર કરવામાં આવશે. જે કોર્પોરેટ ક્ષેત્રના વિકાસને ટેકો આપશે.
રેટિંગ એજન્સીએ જણાવ્યું હતું કે, સિસ્ટમમાં સતત સુધારો, રેપો રેટમાં ઘટાડો અને રોકડ અનામત ગુણોત્તર (સીઆરઆર) ટૂંકા ગાળાના લોન વૃદ્ધિમાં મદદ કરશે તેવી અપેક્ષા છે. હાલમાં, લોન વૃદ્ધિ વાર્ષિક ધોરણે લગભગ નવ ટકા ઘટી ગઈ છે.
એપ્રિલ ૨૦૨૫માં લોન વૃદ્ધિ ૯.૯ ટકા હતી અને ૨૦૨૪માં ૧૯.૪ ટકાની સરખામણીમાં તેમાં નોંધપાત્ર ઘટાડો થયો હતો. આ ઘટાડો મુખ્યત્વે ઉચ્ચ આધાર અસર અને રિટેલ અને એનબીએફસીના ધીમા વિકાસને કારણે હતો.
ઇન્ડ-રાએ એપ્રિલ ૨૦૨૫ના ડેટાથી વાર્ષિક ધોરણે લોન વૃદ્ધિ ૯.૯ ટકા હોવાનો અંદાજ લગાવ્યો હતો. આમાં, રિટેલ સેગમેન્ટનો હિસ્સો ૩૪.૬ ટકા, સેવા ક્ષેત્રનો ૨૯.૮ ટકા, ઉદ્યોગનો ૨૨.૬ ટકા અને કૃષિનો ૧૩.૪ ટકા છે.
એપ્રિલમાં, રિટેલ લોન સેગમેન્ટમાં અસુરક્ષિત રિટેલ લોનનો હિસ્સો વાર્ષિક ધોરણે ૨૭ ટકા વધ્યો હતો. ઇન્ડ-રા અનુસાર, સેવા ક્ષેત્રના એનબીએફસી એપ્રિલમાં ૨.૯ ટકાના ધીમા દરે વધ્યા હતા.
