અભયમ્ની ટીમે મામલો થાળે પાડયો : પ્રેમી અવારનવાર શંકા કરતો હોવાથી પ્રેમીકાએ લગ્નનો ઈન્કાર કર્યો, આમ છતાં પ્રેમી ધરાર લગ્ન કરવા માંગતો હતો
રાજકોટ, : અવારનવાર પ્રેમી શંકા કરતો હોવાથી પ્રેમીકાએ લગ્નનો ઈન્કાર કરી દીધો હતો. જેને કારણે રોષે ભરાયેલા પ્રેમીએ તેનો મોબાઈલ છીનવી લીધો હતો. આખરે આ મામલો અભયમ્ની ટીમ પાસે પહોંચ્યો હતો. જેણે જરૂરી કાર્યવાહી, કાઉન્સેલીંગ કરી મામલો થાળે પાડયો હતો. અભયમ્નાં હેલ્પલાઈન નંબર પર એક યુવતીએ કોલ કરી એવી ફરિયાદ કરી હતી કે, તેનાં પ્રેમીએ તેનો મોબાઈલ ફોન છીનવી લીધો છે. જેથી કાઉન્સેલર મળ્યા હતાં. જેને યુવતીએ કહ્યું કે, તે તેનાં પ્રેમીનાં 6 વર્ષ પહેલા સંપર્કમાં આવી હતી. જે દરમિયાન બંનેને એક બીજા સાથે પ્રેમ થઈ ગયો હતો. બંને એકબીજા સાથે લગ્ન પણ કરવાનાં હતાં. પરંતુ છેલ્લા બે વર્ષથી તેનાં પ્રેમીનું વર્તન બદલાઈ ગયું હતું. તે તેની ઉપર અવારનવાર શંકા કરતો હતો. જેથી તેણે લગ્નનો ઈન્કાર કરી દીધો હતો. પરિણામે તેનો પ્રેમી તેની સાથેનાં ફોટા તેનાં માતા પિતાને મોકલી દેવાની ધમકી આપતો હતો. એટલું જ નહીં તેનો મોબાઈલ ફોન પણ છીનવી લીધો હતો.
