સે-૩૦ની ડમ્પિંગ સાઈટમાં બાયોમાઇનિંગ પ્રક્રિયા દ્વારા
કોર્પોરેશન ડમ્પિંગ સાઇટ પર હવે અર્બન ફોરેસ્ટ ઉભુ કરશે ઃ નદી કિનારે મિયાવાકીથી એક લાખ વૃક્ષો વવાશે
ગાંધીનગર : ગાંધીનગર મહાનગરપાલિકાએ સ્વચ્છતા અને પર્યાવરણ સંરક્ષણ
ક્ષેત્રે એક અનોખી પહેલ કરી છે. શહેરના સેક્ટર-૩૦ ખાતે આવેલી ડમ્પિંગ સાઈટ, જ્યાં વર્ષોેથી
એકઠો થયેલો અંદાજે પાંચ લાખ મેટ્રિક ટન કચરો લિગસી વેસ્ટ એટલે કે, ઘન કચરો હતો, તેનો નિકાલ કરીને
ત્યાં એક વિશાળ અર્બન ફોરેસ્ટ બનાવવાનો નિર્ણય લેવામાં આવ્યો છે.
આ કાર્યનો પ્રારંભ માર્ચ ૨૦૨૪માં બાયોમાઇનિંગ પ્રક્રિયા
દ્વારા થયો હતો. અત્યાધુનિક ટ્રોમીલ મશીનનો ઉપયોગ કરીને કચરાને અલગ કરવામાં આવ્યો.
આ પ્રક્રિયામાં ૧૫ આઈવા ટ્રક,
૭ એસ્કેવેટર જેસીબી,અને ૬
જેસીબી જેવા મોટા વાહનોનો રાત-દિવસ ઉપયોગ કરવામાં આવ્યો હતો. મે ૨૦૨૫ સુધીમાં
અંદાજિત ચાર લાખ મેટ્રિક ટન કચરાનો સફળતાપૂર્વક નિકાલ કરવામાં આવ્યો છે. આ કામગીરી
પૂર્ણતાના આરે છે, જેના
પરિણામે મહાનગરપાલિકાને આશરે પાંચ હેક્ટર જેટલી વિશાળ જમીન પાછી મળી છે.
પાંચ હેક્ટર જમીન સાફ થયા બાદ તેને વૃક્ષારોપણ માટે તૈયાર
કરવામાં આવી છે. આ સ્થળ પર બીજના જમનેશનનો પ્રયોગ પણ કરવામાં આવ્યો હતો. હવે આ
જગ્યાને ફેન્સિંગ અને પિયતની વ્યવસ્થાથી સુરક્ષિત કરીને મિયાવાકી વનીકરણ પદ્ધતિ
દ્વારા વૃક્ષો વાવવામાં આવશે. આ અભિયાન હેઠળ પીપળ, વડ,
ઉમરો, નગોડ અને
લીમડા જેવી સ્થાનિક પ્રજાતિના એક લાખથી પણ વધુ વૃક્ષોનું વાવેતર કરવામાં આવશે.
