(પ્રતિનિધિ તરફથી) અમદાવાદ, ગુરૃવાર
ગુડ્સ એન્ડ સર્વિસ ટેક્સના સ્લેબના રિસ્ટ્રક્ચરિંગ માટે મળી રહેલી ગુડ્સ એન્ડ સર્વિસ ટેક્સની કાઉન્સિલની બેઠકમાં એચએસએન કોડને લગતી સમસ્યાનો ઉકેલ લાવી આપવાની માગણી કરવામાં આવી છે. કસ્ટમ્સ ડયૂટી આઠ આંકડાંના એચએસએન કોડ પર નક્કી કરવામાં આવે છે. જ્યારે ગુડ્સ એન્ડ સર્વિસ ટેક્સના દર ચાર આંકડાંના એચએસએનને આધારે નક્કી કરવામાં આવે છે. આમ એચએસએન કોડના આંકડાંઓ આઠ અને ચાર હોવાથી ઘણી વાર મિસમેચની સમસ્યા થાય છે. મિસમેચની આ સમસ્યા દૂર કરી આપવા માટે યોગ્ય નિર્ણય ગુડ્સ એન્ડ સર્વિસ ટેક્સ કાઉન્સિલની આગામી બેઠકમાં નિર્ણય લેવામાં આવે તેવી માગણી કરવામાં આવી છે.
એચએસએન કોડના આંકડાંઓની અલગતા (આઠ અને ચાર આંકડાં)ને કારણે સતત મિસમેચ થયા જ કરે છે. તેને પરિણામે જીએસટીના ઇન્વોઈસ બનાવવામાં પણ ભૂલ થઈ રહી છે. તેની અસર હેઠળ વેપારીઓને ઇનપુટ ટેક્સ ક્રેડિટ લેવામાં પણ તકલીફ પડી રહી છે, એમ ગુજરાત ચેમ્બર ઓફ કોમર્સ એન્ડ ઇન્ડસ્ટ્રીઝે કેન્દ્ર સરકારમાં કરેલી રજૂઆતમાં જણાવવામાં આવ્યું છે. આ સમસ્યાને કારણે વેપારીઆલમની કઠણાઈ સતત વધી રહી છે. આ સમસ્યાનો ઉકેલ લાવવા માટે જીએસટીના દર નક્કી કરવા માટેની સિસ્ટમમાં થોડો બદલાવ લાવવો જરુરી છે. જીએસટીના દર ચેપ્ટરવાઈઝ નક્કી કરવા જોઈએ. એચએસએન કોડ પ્રમાણે જીએસટીના દર નક્કી કરવાની પ્રથાને વેપારીઓના હિતમાં તિલાંજલી આપવી જોઈએ.
આ જ રીતે ઔદ્યોગિક સેક્ટર પ્રમાણે જીએસટીના દરમાં સમાનતા હોવી જરુરી છે.તેમ કરવાથી દરેક ઇનપુટના, ઇન્ટરમિડીયેટ્સના તથા ફિનિશ્ડ ગુડ્સ પરના જીએસટીના દરમાં એક સમાનતા આવી જશે.
તેમ થવાની ઇન્વર્ટેડ ડયૂટી સ્ટ્રક્ચરની સમસ્યા ઓછી થઈ જશે. ઇન્વર્ટેડ ડયૂટી સ્ટ્રક્ચરમાં ઇનપુટ પર વધુ જીએસટી લાગતો હોવાથી અને ફિનિશ્ડ પ્રોડક્ટ પર ઓછો જીએસટી લાગતો હોવાથી તેના મેન્યુફેક્ચરર્સની ઇનપુટ ટેક્સ ક્રેડિટ પડી જ રહે છે. તેના પૈસા રોકાયેલા જ રહે છે. તેનાથી તેમને કાર્યકારી મૂડીની જરૃરિયાત સતત વધતી જ જાય છે. ઉપરોક્ત સૂચના પ્રમાણે જીએસટી લેવાની વ્યવસ્થા લાગુ કર્યા પછીય ઇન્વર્ટેડ ડયૂટી સ્ટ્રક્ચરની સમસ્યા નડે તો તેવા સંજોગમાં મેન્યુફેક્ચરરને તેની બાકી રહેતી ઇનપુટ ટેક્સ ક્રેડિટની સંપૂર્ણ રકમ ટેક્સ ક્રેડિટના સ્વરુપમાં મળી જાય ેતવી વ્યવસ્થા દાખલ કરવી જોઈેએ. કેપિટલ ગુડ્સ અને ઇનપુટ સર્વિસ પરની ટેક્સ ક્રેડિટ કોઈપણ જાતના અવરોધ વિના વેપારીઓને મળવી જોઈએ.
