(પ્રતિનિધિ તરફથી) અમદાવાદ,સોમવાર
આવશ્યક દવાની કેટેગરીમાં આવતી હૃદયરોગ, જ્ઞાાનતંતુ- મજ્જાતંતુની સમસ્યાઓ, કાન, નાક અને ગળાની તકલીફ, ન્યુરોલોજિકલ ડિસઓર્ડરની દવાઓ સહિતની ૯૦૦થી વધુ દવાઓના ભાવમાં પહેલી એપ્રિલ ૨૦૨૫થી વધારો થશે. ડાયાબિટીસ, ચેપ સામે રક્ષણ આપતી દવાઓના ભાવમાં પણ વધારો થશે. આ ભાવ વધારો પોણા બે ટકાની આસપાસનો રહેવાની સંભાવના છે. નેશનલ ફાર્માસ્યૂટિકલ પ્રાઈસિંગ ઓથોરિટીએ આ ભાવ વધારાને મંજૂરી આપી છે. દર વર્ષે આ વધારો આપવામાં આવે છે. આગળના વર્ષના ૨૦૨૪ની સાલના હોલસેલ પ્રાઈસ ઇન્ડેક્સની વધઘટને આધારે આ ભાવ સુધારો કરવામાં આવે છે. ડ્રગ પ્રાઈસ કંટ્રોલ ઓર્ડરના ફકરાં નંબર ૧૬(૨)માં મેન્યુફેક્ચરર્સને હોલસેલ પ્રાઈસ ઇન્ડેક્સના વધાર પ્રમાણે દવાના ભાવમાં વધારો કરવાની છૂટ આપવામાં આવેલી છે.
૨૦૨૩ની હોલસેલ પ્રાઈસ ઇન્ડેક્સની તુલનાએ ૨૦૨૪માં જોવા મળેલા વધારને ધ્યાનમાં રાખીને પ્રસ્તુત વધારો માન્ય રાખવામાં આવ્યો છે. હોલસેલ પ્રાઈસ ઇન્ડેક્સમાં આવેલા વધારા પ્રમાણે દવાના મેન્યુફેક્ચરર્સ તેમની દવાના ભાવમાં પોણા બે ટકા સુધીનો વધારો કોઈની પણ આગોતરી મંજૂરી લીધા વિના કરી શકે છે. આ સિવાયના કિસ્સાઓમાં દવાના ઉત્પાદકોએ નેશનલ ફાર્માસ્યૂટિકલ પ્રાઈસિંગ ઓથોરિટી સમક્ષ રજૂઆત કરીને ભાવમાં વધઆરો કરી આપવાની વિનંતી કરવી પડે છે.
એન્ટિબાયોટિક તરીકે એઝિથ્રોમાઈસિનનો ઉપયોગ વ્યાપકપણે કરવામાં આવે છે. એઝિથ્રોમાઈસિનને ૨૫૦ એમજીની ટેબ્લેટની મહત્તમ કિંમત રૃ. ૧૧.૮૭ અને ૫૦૦ એમજીની ટેબ્લેટની એમ.આર.પી. રૃ. ૨૩.૯૮ રાખવામાં આવેલી છે. તેની સામે એન્ટિબેક્ટેરિયલ ડ્રાય સિરિપ એમોક્સિસિલીન અને ક્લેવાલાનિક એસિડની મહત્તમ મિલિલીટર દીઠ કિંમત રૃ. ૨.૦૯ નક્કી કરવામાં આવેલી છે. એસિક્લોવિર જેવી એન્ટિવાયરલ દવાના ૨૦૦ એમજીની ટેબ્લેટના મહત્તમ ભાવ રૃ. ૭.૭૪ અને ૪૦૦ એમજીની ટેબ્લેટના રૃ. ૧૩.૯૦ નક્કી કરવામાં આવ્યા છે. તેમ જ એન્ટિમેલેરિયાની દવા હાઈડ્રોક્લોરોક્વિનની ૨૦૦ એમજીની ટેબ્લેટના રૃ. ૬.૪૭ અને ૪૦૦ એમજીની ટેબ્લેટના રૃ. ૧૪.૦૪ના ભાવ નક્કી કરવામાં આવ્યા છે.
પેઈનકિલર તરીકે વપરાતી દવા ડાઈક્લોફેનાકની ટેબ્લેટના મહત્તમ ભાવ રૃ. ૨.૦૯ના નક્કી કરવામાં આવ્યા છે. આજ રીતે આઈબુપ્રોફેન ૨૦૦ એમજીની ટેબ્લેટનો ભાવ ૦.૭૨ પૈસા અને ૪૦૦ એમજીની ટેબ્લેટના ભાવ રૃ.૧.૨૨ નક્કી કરવામાં આવ્યો છે. આ જ રીતે ડપાગ્લિફ્લોઝિન, મેટફાર્મિન હાઈડ્રોક્લોરાઈડ અને ગ્લિમિપ્રાઈડ ટેબ્લેટદીઠ ભાવ રૃ. ૧૨.૭૪ નક્કી કરી આપવામાં આવ્યા છે. નેશનલ લિસ્ટ ઓફ એસેન્શિયલ મેડિસિનમાં એનેસ્થેશિયાની, એલર્જીનો પ્રતિકાર કરવાની ક્ષમતા ધરાવતી દવાનો પણ સમાવેશ થાય છે. આ દવાઓમાં પેરાસિટામોલ, એનિમિયા તથા વિટામિનની દવાઓનો પણ નેશનલ લિસ્ટ ઓફ એસેન્શિયલ મેડિસિનમાં સમાવેશ થાય છે.
સ્ટેન્ટના ભાવમાં પણ વધારો થશે
હૃદયરોગના દરદીઓ માટે વપરાતા બેર મેટલના સ્ટેન્ટની કિંમત રૃ. ૧૦,૬૯૩ કરી દેવામાં આવી છે. સમયાંતરે લોહમાં દવા છોડયા કરતા સ્ટેન્ટની કિંમત રૃ. ૩૮.૯૩૩ નક્કી કરવામાં આવી છે. હોલસેલ પ્રાઈસ ઇન્ડેક્સના વધારાને આધારે તેના ભાવમાં પણ બે ટકાનો વધારો કરી શકે છે. આ વધારો રૃ. ૨૦૦થી રૃ. ૭૬૦ સુધીનો આવી શકે છે. જોકે સ્ટેન્ટના ભાવ ઘટયા પછી તેની પ્રોસિજર એટલે કે સ્ટેન્ટ બેસાડવાની પ્રક્રિયાના ચાર્જ ડૉક્ટરે બમણા કે ત્રણ ગણા કરી દીધા છે. પહેલા સ્ટેન્ટના ભાવ રૃ.૧.૫૦થી રૃ. ૧.૮૦ લાખ લેવાતા હતા. સ્ટેન્ટના ભાવ ઘટયા પછી ડૉક્ટરોએ તેને બેસાડવાની પ્રક્રિયા ભાવ વધારી દઈને દરદીના ખિસ્સા પરનો બોજ હળવો થવા દીધો નથી.
