ગાંધીનગર મહાનગરપાલિકાના કુડાસણ વિસ્તારમાં
સેનિટેશન શાખા દ્વારા ઓચિંતી તપાસ હાથ ધરવામાં આવતા ૧૫ કિલો પ્રતિબંધિત પ્લાસ્ટિક મળી આવ્યું
ગાંધીનગર : ગાંધીનગર મહાનગરપાલિકા દ્વારા હાલ સ્વચ્છતા ઉપર ભાર
મૂકવામાં આવી રહ્યો છે અને પર્યાવરણની જાળવણી માટે પ્લાસ્ટિક ઉપર પ્રતિબંધ
મૂકવામાં આવ્યો છે ત્યારે આજે હાથ ધરાયેલા ચેકિંગમાં કુડાસણમાં મેડિકલ સ્ટોરમાંથી
૧૫ કિલો પ્રતિબંધિત પ્લાસ્ટિક અને જાહેરમાં કચરો ફેકાતો હોવાનું બહાર આવતા ૫ હજાર
રૃપિયાનો દંડ ફટકારવામાં આવ્યો છે.
પાટનગર ગાંધીનગર શહેરને હાલ સ્વચ્છ અને સુંદર બનાવવા માટે
મહાનગરપાલિકા દ્વારા સ્વચ્છતા ઉપર ભાર મૂકવામાં આવ્યો છે અને એટલું જ નહીં સિંગલ
યુઝ પ્લાસ્ટિક ઉપર પ્રતિબંધ ફરમાવીને અલગ અલગ વિસ્તારમાં સમયાંતરે તપાસ પણ કરવામાં
આવી રહી છે ત્યારે આજે મહાનગરપાલિકાની સેનિટેશન શાખા દ્વારા કુડાસણ વિસ્તારમાં
ઓચિંતી તપાસ હાથ ધરવામાં આવી હતી. જેમાં કુડાસણમાં આવેલા જય પ્રભુ મેડિકલ સ્ટોરમાં
પ્રતિબંધિત પ્લાસ્ટિકના મોટો જથ્થો મળી આવ્યો હતો. એટલું જ નહીં આ મેડિકલ સ્ટોરની
બાજુમાં કચરો ઠાલવવામાં આવતો હોવાનું પણ ધ્યાને આવ્યું હતું. જેના પગલે ૧૫ કિલો
જેટલા પ્રતિબંધિત પ્લાસ્ટિકના જથ્થાને જપ્ત કરી લેવામાં આવ્યો હતો અને ગંદકી
ફેલાવવા બદલ ૫ હજાર રૃપિયાનો દંડ કરવામાં આવ્યો હતો તો મેડિકલ સ્ટોરના સંચાલકોને
સ્થળ ઉપર સફાઈ કરવા માટે સૂચના આપવામાં આવી હતી. આગામી સમયમાં પણ શહેરના અન્ય
વિસ્તારોમાં આ પ્રકારે તપાસ કરવામાં આવશે અને પ્રતિબંધિત પ્લાસ્ટિકના ઉપયોગ બદલ
કડક કાર્યવાહી કરવાનો નિર્દેશ આપવામાં આવ્યો છે.
