– મેક્સિકોમાં સૈન્ય કાર્યવાહીની ટ્રમ્પની જાહેરાતથી ભારે વિવાદ
– એક સાંસદે બીજા સાંસદને બોલવાની તક ના આપતા વિવાદ શરૂ થયો, બન્નેના ઝઘડામાં અન્ય સાંસદો પણ જોડાતા ‘યુદ્ધ’ જામ્યું !
નવી દિલ્હી: મેક્સિકોની સંસદને સાંસદોએ અખાડો બનાવી દીધી હતી, સાંસદો એકબીજાને ગડદા, પાટા મારતા જોવા મળ્યા હતા. આ સમગ્ર ઘટનાનો વીડિયો સોશિયલ મીડિયા પર વાયરલ થયો હતો. અમેરિકાના પ્રમુખ ડોનાલ્ડ ટ્રમ્પે મેક્સિકોના આતંકવાદી સંગઠન ડ્રગ કાર્ટેલ સામે સૈન્ય કાર્યવાહીનો એક ગુપ્ત આદેશ જાહેર કર્યો હતો, જેને લઇને મેક્સિકોની સંસદમાં સાંસદો વચ્ચે મારામારી થઇ હતી. સાંસદોની આ મારામારી એટલી હિંસક હતી કે જેમાં કેટલાક સાંસદો ઘાયલ થઇ ગયા હતા. સત્તાધારી પક્ષ મોરેના પાર્ટીના સાંસદ ફર્નાન્ડિઝ નોરોના ભાષણ આપી રહ્યા હતા ત્યારે અચાનક જ વિરોધી પક્ષ ઇન્સ્ટિટયૂશનલ રિવલૂશનરી પાર્ટી (પીઆરઆઇ)ના સાંસદ મોરેનો તેમની પાસે ગયા હતા અને પોતાને માઇક આપી બોલવાની તક આપવા કહ્યું હતંુ જોકે ફર્નાન્ડિઝે ના પાડી દીધી હતી તેથી બાદમાં બન્ને વચ્ચે મારામારી થઇ હતી. ફર્નાન્ડિઝ કહી રહ્યા છે કે મને સ્પર્શ ના કરશો જ્યારે મોરેનો વારંવાર તેમના હાથને પકડીને મને બોલવા દો તેવું કહેતા સાંભળવા મળ્યા હતા. બાદમાં બન્ને વચ્ચે મારામારી શરૂ થઇ ગઇ હતી. બાદમાં અન્ય સાંસદો પણ આ હિંસક હુમલામાં જોડાયા હતા અને એકબીજા પર ગડદા પાટાથી હુમલો કરવા લાગ્યા હતા.
સમગ્ર ગૃહમાં દોડાદોડી જોવા મળી હતી, વિવાદ બાદ બન્ને સાંસદોએ પ્રેસ કોન્ફરંસ કરીને સમગ્ર ઘટના અંગે એકબીજા પર આરોપો લગાવ્યા હતા. ફર્નાન્ડિઝે કહ્યું હતું કે મોરેનોએ સૌથી પહેલા મને હાથ પકડીને ખેંચવાનો પ્રયાસ કર્યો હતો, મને ધક્કો મારવા લાગ્યા હતા. બાદમાં મારા પર હુમલો કરી દીધો હતો. જ્યારે મોરેનોએ દાવો કર્યો હતો કે મે નહીં પણ ફર્નાન્ડિઝે સૌથી પહેલા મારા પર હુમલો કર્યો હતો.
