– પીએમ મોદીએ સેમીકન્ડક્ટરને 21મી સદીનો ડિજિટલ હીરો ગણાવી
– ભારતમાં બનેલી એક નાનકડી ચિપ સમગ્ર વિશ્વમાં મોટા પરિવર્તનનું કારણ બનશે એ દિવસો હવે દૂર નથી : મોદી
– વિશ્વને ભારત પર ભરોસો છે માટે આપણી સાથે મળીને સેમીકન્ડક્ટરના ભવિષ્યનું નિર્માણ કરવા તૈયાર છે : પીએમ
નવી દિલ્હી : ભારતને પ્રથમ સ્વદેશી વિક્રમ-૩૨ બિટ માઇક્રોપ્રોસેસર ચિપ મળી ગઇ છે. આ ચિપના લોન્ચિંગ પ્રસંગે વડાપ્રધાન નરેન્દ્ર મોદીએ કહ્યું હતું કે એ દિવસો દૂર નથી જ્યારે ભારતમાં બનેલી એક નાની એવી ચિપને કારણે વિશ્વમાં મોટું પરિવર્તન આવશે. સેમીકોન ઇન્ડિયા ૨૦૨૫ના સમ્મેલનમાં કેન્દ્રીય મંત્રી અશ્વિની વૈષ્ણવે વડાપ્રધાન મોદીને વિક્રમ-૩૨ બિટ પ્રોસેસર અને ચાર સેમીકન્ડક્ટર પ્રોજેક્ટના ટેસ્ટ ચિપ્સ આપી વિસ્તૃત માહિતી આપી હતી. મોદીએ આ સેમીકન્ડક્ટરને ૨૧મી સદીનો ડિજિટલ હીરો ગણાવી હતી.
ચંડીગઢમાં ઇસરોના સેમિકન્ડક્ટર લેબ દ્વારા વિક્રમ સારાભાઇ સ્પેસ સેન્ટર સાથે મળીને આ ચિપ તૈયાર કરવામાં આવી છે જે ભારતની પ્રથમ ૩૨-બિટ માઇક્રોપ્રોસેસર ચિપ છે. આ ચિપને સત્તાવાર રીતે વિક્રમ૩૨૦૧ નામ આપવામાં આવ્યું છે, મોબાઇલ, કમ્પ્યૂટર, રાઉટર, કાર, સેટેલાઇટ જેવા એડવાન્સ્ડ ડિજિટલ ડિવાસમાં સેમીકન્ડક્ટર ચિપ મગજનું કામ કરે છે. આ તમામ આધુનિક ડિવાઇસની તાકાત આ નાની એવી ચિપ માનવામાં આવે છે.
દિલ્હીમાં આયોજિત સેમિકોન ઇન્ડિયા ૨૦૨૫ કોન્ફરંસમાં વડાપ્રધાન નરેન્દ્ર મોદીની હાજરીમાં દેશમાં બનેલા ચિપ-ટેસ્ટ ચિપ્સનું પ્રદર્શન કરવામાં આવ્યું હતું જેમાં સૌથી ચર્ચામાં ઇસરોની લેબોરેટરી દ્વારા વિકસિત વિક્રમ-૩૨ બિટ પ્રોસેસર મુખ્ય હતું જેને સ્પેસ લોન્ચ વ્હીકલ વગેરેમાં ઉપયોગમાં લઇ શકાય તે રીતે ડિઝાઇન કરવામાં આવ્યું છે. આ પ્રસંગે વડાપ્રધાન નરેન્દ્ર મોદીએ ખુદ આ ચિપ્સનું નિરિક્ષણ કર્યું હતું. આ કાર્યક્રમમાં ૫૦ દેશોથી આવેલા સેમિકન્ડક્ટર ક્ષેત્રના નિષ્ણાતોને સંબોધતા નરેન્દ્ર મોદીએ કહ્યું હતું કે ૧૮ બિલિયન ડોલરના ૧૦ સેમિકન્ડક્ટર પ્રોજેક્ટ્સ હાલ સક્રિય અવસ્થામાં છે, અને ભારત સેમિકન્ડક્ટર મિશનના બીજા તબક્કામાં પ્રવેશવા જઇ રહ્યું છે.
વડાપ્રધાને કહ્યું હતું કે એ દિવસો દૂર નથી જ્યારે ભારતમાં બનેલી એક નાની એવી ચિપથી સમગ્ર વિશ્વમાં પરિવર્તન આવશે. એટલે કે મેડ ઇન ઇન્ડિયા ચિપ વિશ્વના સૌથી મોટા પરિવર્તનનું કારણ બનશે. અહીંયા આ કાર્યક્રમમાં વિવિધ દેશોના પ્રતિનિધિઓ અને યુવાઓની હાજરી દર્શાવે છે કે વિશ્વને ભારત પર ભરોસો છે, વિશ્વ ભારતમાં માને છે, ભારત સાથે મળીને વિશ્વ સેમિકન્ડક્ટરના ભવિષ્યનું નિર્માણ કરવા માટે તૈયાર છે. ભારતની પોલિસી શોર્ટ-ટર્મ સિગ્નલ્સ નહીં પણ લોંગ ટર્મ કટિબદ્ધતા છે, તમામ રોકાણકારોની જરૂરિયાતોને પુરી કરવામાં આવશે. ભારત રિફોર્મ, પર્ફોર્મ અને ટ્રાન્સફોર્મના મંત્રને સાથે રાખીને આ સિદ્ધી પ્રાપ્ત કરી શક્યું છે.
સેમીકન્ડક્ટર ચિપનો ઉપયોગ આ ક્ષેત્રમાં થશે
નવી દિલ્હી : સેમીકન્ડક્ટર ચિપનો ઉપયોગ મોબાઇલ, કમ્પ્યૂટિંગ, બેસબેંડ, પાવર મેનેજમેન્ટ, મેમરી, એપ્લિકેશન પ્રોસેસર, ઓટો, ઇલેક્ટ્રિક વ્હીકલ, બેટરી મેનેજમેન્ટ, એડીએએસ સેંસર, ઇન્ફોટેનમેન્ટ, ટેલીકોમ, ૫-જી, આરએફ, સ્વિચ, રાઉટર, ઇન્ડસ્ટ્રિયલ, માઇક્રોકન્ટ્રોલર્સ, મોટર ડ્રાઇવ, સેંસર-નોડ્સ, એરોસ્પેસ, ડિફેન્સ, સ્પેસ વગેરે ક્ષેત્રમાં થઇ શકશે. નોંધનીય છે કે ચિપ પાતળા સિલિકોન વેપર પર બનેલા લાખો કરોડો ટ્રાઝિસ્ટરોની એક જાળ છે, જે કમ્પ્યૂટ કરે છે, મેમરી મેનેજ કરી શકે છે સાથે જ સિગ્નલ પ્રોસેસ કરે છે જે ડિવાઇસને વધુ સ્માર્ટ બનાવે છે.
