વડોદરા,પંડયા બ્રિજથી ફતેગંજ બ્રિજ પર જતી મોપેડ સવાર બે બહેનપણીઓના મોપેડને અજાણ્યા વાહન ચાલકે પાછળથી ટક્કર મારી રોડ પર ફંગોળી દીધી હતી. પૂરઝડપે ટક્કર મારનાર વાહન ચાલક એક યુવતીને ૩૦૦ મીટર સુધી ઢસડીને બ્રિજ પર લઇ ગયો હતો. ગંભીર ઇજા થતા યુવતીનું ઘટના સ્થળે જ કમકમાટીભર્યુ મોત થયું છે. જ્યારે અન્ય યુવતીને ગંભીર ઇજા થઇ છે.
હરણી વારસિયા રીંગ રોડ પર ચતુરભાઇ કોમ્પલેક્સમાં રહેતી રોમા જીતુભાઇ વંજાણી અને તેની બહેનપણી કાજલ નરસીંગભાઇ કછાવા, ઉં.વ.૩૧ (રહે. સ્વપ્નલોક સોસાયટી, મુક્તાનંદ પાસે, કારેલીબાગ) ગોરવા એલેમ્બિક ખાતે એ.આઇ.એ. બિઝનેસ સોલ્યુશનમાં નોકરી કરે છે. રાતે સાડા ત્રણ વાગ્યે નોકરી પરથી છૂટીને બંને બહેનપણીઓ ઘરે પરત આવતી હતી. રોમા મોપેડ ચલાવતી હતી. મળસ્કે ચાર વાગ્યે પંડયા બ્રિજથી ફતેગંજ બ્રિજ ચડતા સમયે પાછળથી પૂરઝડપે આવતા વાહન ચાલકે મોપેડને ટક્કર મારતા બંને બહેનપણીઓ ફંગોળાઇને રોડ પર પટકાઇ હતી. કાજલ ઉછળીને અકસ્માત કરનાર વાહનની આગળ પડી હતી. તેમછતાંય વાહન ચાલકે બ્રેક મારી નહતી અને અંદાજે ૩૦૦ મીટર સુધી કાજલને ઢસડીને છેક બ્રિજ પર લઇ ગયો હતો. ત્યારબાદ વાહન ચાલક ફરાર થઇ ગયો હતો. ગંભીર રીતે ઘવાયેલી કાજલનું ઘટના સ્થળે જ કમકમાટીભર્યુ મોત થયું હતું. જ્યારે રોમાને પણ ગંભીર ઇજા થઇ હતી. ત્યાંથી પસાર થતા રાહદરીએ એમ્બ્યુલન્સને કોલ કરીને બોલાવતા બંને બહેનપણીઓને સારવાર માટે સયાજી હોસ્પિટલમાં લઇ જવામાં આવી હતી. કાજલનું મોત થયું હતું.જ્યારે રોમાને જમણા હાથે ફ્રેક્ચર થયું હતું. ફતેગંજ પોલીસે આ અંગે ગુનો દાખલ કરી અકસ્માત કરીને ફરાર થઇ ગયેલા વાહન ચાલકની શોધખોળ શરૃ કરી છે.
