Vadodara Helmet Drive : વડોદરા શહેર સહિત સમગ્ર ગુજરાતમાં આગામી તા.15થી દ્વિચક્રી વાહન ચાલકે હેલ્મેટ પહેરવી ફરજીયાત કરવામાં આવી રહી છે ત્યારે લોકો દ્વારા શહેરના રોડ રસ્તાની હાલત સુધારવા સહિત આ કાયદાની શહેરમાં કોઈ જરૂર નહિ હોવાનો સુર સંભળાઈ રહ્યો છે.
ઉલ્લેખનીય છે કે વડોદરા શહેર સહિત સમગ્ર રાજ્યમાં આગામી તા.15મીથી દ્વિચક્રી વાહન ચાલકો માટે હેલ્મેટ પહેરવી ફરજીયાત કરવામાં આવી રહી છે અન્યથા મેમો સહિત દંડનીય કાર્યવાહી પણ કરાશે. જેથી ફરજિયાત હેલ્મેટ અંગેનો ભારે વિરોધ કરીને વડોદરાવાસીઓએ ચૂંટાયેલા પ્રતિનિધિઓને અરજ કરી છે કે
અમારા જ ખોબે ખોબે કરેલ મતદાનથી ચૂંટાયેલા વડોદરાના સાંસદ, ધારાસભ્યો, મેયર, ચેરમેન, કૉર્પોરેટરો તથા નેતાઓને અપીલ કરવામાં આવી છે કે, આગામી તા.15, સપ્ટેમ્બરથી ફરજિયાત હેલ્મેટનો કાયદો વડોદરા શહેરની અંદર શરૂ થવાનો છે. એનાથી સામાન્ય નાગરિકોને ખૂબ જ તકલીફનો સામનો કરવો પડશે. ફરજિયાત હેલ્મેટનો કાયદો મંજૂર નહિ હોવાનો વિરોધી લોકસૂર પ્રગટ થઈ રહ્યો છે. સુરક્ષા જરૂરી છે પણ શહેરની બહાર હાઈ-વે પર હેલ્મેટનો કાયદો ફરજિયાત કરવા અને શહેરના આંતરિક રોડ રસ્તા લોકોની કમર ભાંગી નાખે એવા ખાડા ખાબોચિયાવાળા રોડ રસ્તા છે. ઉપરાંત વડોદરા શહેરમાં ઠેર-ઠેર ટ્રાફિક સિગ્નલ દ્વારા પણ વાહન ચાલકો માટે ચુસ્ત પાલન કરાવાય છે એ જ મોટી વાત છે.
આ ઉપરાંત બીજી અગત્યની વાત એ છે કે પાલિકા તંત્રના પદાધિકારીઓ અને અધિકારીઓ તો સરકારી એર કન્ડિશન વાહનોમાં ફરવાનું હોય છે. એટલે હેલ્મેટનો કાયદો તમને તો નડતો જ નથી. બાકી માથું દ્વિચક્રી વાહન ચાલકનું છે તો એની ચિંતા પણ ચાલકને છે.
તેથી વડોદરાના ચૂંટાયેલા મહાનુભાવોને નમ્ર અરજ છે કે અમારા વતી સરકારને રજૂઆત કરો હેલ્મેટની આ તકલીફમાંથી બહાર કાઢવા જણાવ્યું છે. જો તમારા મતદારોની રજૂઆત ન થાય તો આવનારી ચૂંટણીમાં મતની આશા નહીં રાખવા પણ જાગૃત નાગરિકો દ્વારા ચીમકી આપવામાં આવી છે.
દરમિયાન શહેરના જુદા જુદા પોલીસ સ્ટેશનના વિવિધ વિસ્તારના પોલીસ તંત્ર દ્વારા શહેરમાં હેલ્મેટ આગામી તા.15થી ફરજીયાત હોવા અંગે લોકોમાં જાગૃતિ લાવવા માઇક દ્વારા જાહેરાત કરવામાં આવે છે જ્યારે કેટલાક વિસ્તારોમાં ટ્રાફિક પોલીસ દ્વારા અત્યારથી જ હેલ્મેટ નહીં પહેરી હોવા અંગે દ્વિચક્રી વાહન ચાલકોને મેમો પણ ફટકારવામાં આવી રહ્યા છે.
