ભારતમાં ત્રીજી વખત જ જોવા મળતા કૂતુહલ : ઈરાન-ઈરાકમાં વસવાટ, યુરોપમાં પ્રજનન, આફ્રિકામાં શિયાળો ગાળતું પક્ષી પશ્ચિમી દેશોમાં ભાગ્યે જ આવે છે !
જામનગર, : જામનગર અને દ્વારકા જિલ્લો વિશાળ સમુદ્ર કાંઠો અને જંગલ જેવો વીડી વિસ્તાર ધરાવે છે, જેના પરિણામે 400થી વધુ દેશ વિદેશના પક્ષીઓનું આવા-ગમન થતું રહે છે અને દર વરસે કેટલાક દુર્લભ વિદેશી પક્ષીઓ પણ નોંધાતા રહે છે.
હવે દ્વારકાના પ્રવાસે આવેલા શ્રવેથા ભારાથી નામના મહિલા પક્ષીવિદને દુર્લભ પક્ષી ‘માસ્કડ શ્રાઈક’ શિવરાજપુર બીચ નજીક જોવા મળ્યું હતું. જે દ્વારકા જિલ્લાનો પ્રથમ રેકોર્ડ છે. આ અગાઉ 2016માં સુરતના ન્યારા નજીક અને 2014માં લડાખના એક ગામમાં જોવા મળી હોવાનું પક્ષી અંગેની નોંધમાં જોવા મળે છે. દક્ષિણ પૂર્વ યુરોપ અને ભુમધ્ય સમુદ્રના પૂર્વ છેડે પ્રજનન કરતું અને પૂર્વી ઈરાક અને પશ્ચિમ ઈરાનમાં વસ્તી ધરાવે છે. મુખ્યત્વે ઉત્તરપૂર્વ આફ્રિકામાં શિયાળો ગાળે છે. જોકે તે ટૂંકા અંતરનું સ્થળાંતર કરે છે, અને ઉત્તર અને પશ્ચિમ યુરોપ સહિત અન્યત્ર વ્યાપકપણે જોવા મળે છે.
શ્રાઈક જાતિનં સૌથી નાનું પક્ષી છે. જેની લાંબી પૂંછડી, હૂકવાળી ચાંચ અને માથાનો ભાગ કાળો હોય છે અને કપાળ પર સફેદ અને ખભા અને પાંખો પર મોટા સફેદ ધબ્બા હોય છે. ગળા, ગરદનની બાજુઓ અને નીચેનો ભાગ સફેદ અને છાતી નારંગી હોય છે. આ પ્રજાતિના પક્ષીના અવાજ ટૂંકા અને જાળીદાર હોય છે, પરંતુ ગીતમાં મધુર વાર્બલર જેવા ઘટકો હોય છે. આ દુર્લભ પક્ષી ભાગ્યે જ પશ્ચિમના દેશોમાં આવે છે. આવું દુર્લભ પક્ષી શિવરાજપુર બીચ નજીક જોવા મળતાં દેશભરમાંથી અનેક પક્ષીવિદો અને વાઈલ્ડ લાઈફ ફોટોગ્રાફરો તેને નિહાળવા અને ફોટોગ્રાફી માટે આવી રહ્યા છે.
