– ઝાલોદ ખાતે જીયુવીએનએલ અને એમજીવીસીએલ
– 22 ટીમે 630 ઉપરાંત વીજ મીટરોની ચકાસણી કરી 43 વીજ ચોરી ઝડપી
ઝાલોદ : ઝાલોદ ખાતે જીયુવીએનએલ અને એમજીવીસીએલ વીજ કંપનીની વિજિલન્સ ટીમના દરોડામાં એક કરોડ છ લાખની વીજ ચોરી ઝડપાઈ છે.આ કંપનીઓની ૨૨ ટીમે ૬૩૦ ઉપરાંત વીજ મીટરોની ચકાસણી કરી ૪૩ ગ્રાહકોની વીજ ચોરી ઝડપી પાડી હતી.
ઝાલોદ નગર તેમજ પેથાપુર તેમજ કદવાળ મુકામે જીયુવીએનએલ અને એમજીવીસીએલ વિજિલન્સની ૨૨ જેટલી ટીમ દ્વારા પોલિસ બંદોબસ્ત સાથે ગ્રાહકોના વીજ મીટર ચેક કરવાની કામગીરી કરવામાં આવી હતી. જેમાં અંદાજીત ૬૩૦ ઉપરાંત વીજ ગ્રાહકોના વીજ મીટરોની ચકાસણી કરાઈ હતી.જેમાં ૪૩ વીજ ગ્રાહકો પર જીયુવીએનએલ અને એમજીવીસીએલ વિજિલન્સ ટીમ દ્વારા કાયદેસરની કાર્યવાહી કરવામાં આવી હતી. જેમાં પાંચ જેટલા વીજ ગ્રાહકોના ઘરે ડાયરેક્ટ વીજ લાઈન ચાલતી હતી. તેમજ પાંત્રીસ જેટલા શંકાસ્પદ લાગતા વીજ ગ્રાહકો(ઘરના લાઈટ મીટરમાંથી દુકાનમાં લાઇટ સપ્લાય) વીજ લાઈનનો વપરાશ ખોટી રીતે કરતા ઝડપાયા હતા.તેમજ ત્રણ અન્ય એમ કુલ ૪૩ જેટલા ગ્રાહકો પર એમજીવીસીએલ વિજિલન્સ ટીમ દ્વારા એક કરોડને છ લાખની વીજ ચોરી ઝડપી પાડી હતી. એમજીવીસીએલ વિજિલન્સ ટીમ આગામી દિવસોમાં પણ ઝાલોદ તાલુકાના અલગ અલગ વિસ્તારોમાં ચેકિંગ હાથ ધરનાર છે. મધ્ય ગુજરાત વીજ કંપની દ્વારા વીજ ચોરી અટકાવી પારદર્શક રીતે વિજ વિતરણ થાય અને જનતાને સારી સુવિધા મળે તે માટે આ પગલું લેવામાં આવેલ છે. હાલ તો નગરમાં વીજ ચોરી કરતા લોકોમાં ફફડાટ વ્યાપેલો જોવા મળ્યો છે.
