Surat Car Accident: સુરતના દાંડી રોડ પર આવેલા અંભેટા ગામના પાટીયા નજીક મોડી રાત્રે એક ગમખ્વાર અકસ્માત સર્જાયો હતો, જેમાં કારચાલકે સ્ટિયરિંગ પરનો કાબૂ ગુમાવતા કાર કાંસમાં ખાબકી હતી. આ દુર્ઘટનામાં નહેર પાણીમાં ડૂબી જવાથી બે યુવકોના કરૂણ મોત નીપજ્યા છે.
પ્રાપ્ત માહિતી અનુસાર, મોડી રાત્રે પૂરપાટ ઝડપે જઈ રહેલી કારના ચાલકે અચાનક કાબૂ ગુમાવ્યો હતો, જેના પરિણામે કાર રોડની બાજુમાં આવેલી પાણીની નહેરમાં ખાબકતાં ફસાઈ ગઈ હતી અને અંદર રહેલા બે યુવકો બહાર નીકળી શક્યા નહોતા, જેના કારણે તેમનું ઘટનાસ્થળે જ મોત થયું હતું.
ઘટનાની જાણ થતાં જ સ્થાનિક પોલીસ અને ફાયર બ્રિગેડની ટીમ તાત્કાલિક ઘટનાસ્થળે દોડી આવી હતી. ફાયર ટીમે ભારે જહેમત બાદ બંને યુવકોના મૃતદેહને બહાર કાઢી પોસ્ટમોર્ટમ માટે હોસ્પિટલ ખસેડ્યા હતા. આ યુવકોના મોતના સમાચારથી તેમના પરિવારમાં શોકનો માહોલ છવાઈ ગયો છે. પોલીસે આ અંગે ગુનો નોંધી વધુ તપાસ હાથ ધરી છે.
