– રૂપિયા 6.65 લાખની મત્તા ચોરાઇ હતી
– રોકડ 1.60 લાખ સાથે આરોપીની ધરપકડ : અન્ય બે શખ્સોને પકડવા પોલીસની કવાયત
નડિયાદ : નડિયાદ તાલુકાના મહોળેલ ગામમાં તસ્કરો બંધ મકાનમાંથી સોનાના દાગીના તેમજ રોકડ મળી કુલ રૂ.૬.૬૫ લાખની મત્તા ચોરી ગયા હતા. આ ચોરીના ગુનાનો ભેદ પોલીસે ઉકેલી કાઢ્યો હતો. આરોપીની રોકડ ૧.૬૦ લાખ સાથે ઝડપી પાડયો હતો. અન્ય બે આરોપીને પકડવા માટે પોલીસે કવાયત હાથ ધરી છે.
નડિયાદ તાલુકાના મહોળેલ ગામમાં રહેતા હેમાબેન પ્રવિણસિંહ રાજ શિક્ષિકા તરીકે નોકરી કરે છે તેઓ તા.૧૬ના રોજ મકાનને તાળું મારી નોકરી પર ગયા હતા જ્યાંથી તેમની માતા બીમાર હોય સારવાર માટે નડિયાદ હોસ્પિટલમાં લઈને ગયા હતા જ્યાં તેઓ રાત્રી સમયે રોકાયા હતા. આ દરમિયાન રાત્રી સમયે કોઈ તસ્કરો તેમના બંધ મકાનના દરવાજાનો નકુચો તોડી ઘરમાં પ્રવેશ કરી તીજોરી તોડી સોનાના દાગીના જેમાં સોનાનો સેટ, સોનાની બુંટી, સોનાની વીંટીઓ તથા સોનાની કાનની શેર તથા સોનાની નાકની વાળી સહિત આશરે રૂ. ૪,૯૦,૦૦૦ ના દાગીના અને રોકડ રૂપિયા ૧,૭૫,૦૦૦ મળી કુલ રૂ. ૬,૬૫,૦૦૦ ની મત્તા ચોરી નાસી ગયા હતા.આ અંગે ચકલાસી પોલીસે ગુનો નોંધી કાર્યવાહી હાથ ધરી હતી.
ચકલાસી પોલીસે ચોરીનો ગુનો ઉકેલવા તપાસ હાથ ધરી હતી.આ દરમિયાન અગાઉ ચોરીના ગુનાઓમાં પકડાયેલા આરોપી રાજેન્દ્રસિંગ સરદાર (રહે. ફિણાવ ભાગોળ, તા.મહુધા) આ ગુનામાં સંડોવાયો હોવાનું જણાય આવતા આરોપીને શોધી કાઢવા સર્વેલન્સ સ્કોવર્ડના સ્ટાફે તા.૨૭/૦૯/૨૦૨૫ ના રોજ પેટ્રોલીંગમાં હતા.આ દરમિયાન બાતમી મળેલ કે રાજેન્દ્રસિંગ સરદાર મહુધાની આજુબાજુના ગામમાં ભુંડ પકડવા ગયો છે જે બાતમી આધારે પોલીસે વોચ ગોઠવીને રાજેન્દ્રસિંગ સરદાર મળી આવતા તેની અટક કરી પુછપરછ કરતા આરોપીએ સહ આરોપીઓ ચિલુસિંગ ગુરમુખસિંગ સીકલીગર અને બલવીરસિંગ ઉર્ફે બલ્લી નેપાલસિંગ સીકલીગર (બંને રહે. એકતા નગર, વડોદરા) સાથે મળીને ચોરીની ઘટનાને અંજામ આપ્યો હોવાની કબુલાત કરી હતી. જેથી ચકલાસી પોલીસે આરોપી પાસેથી જાળીનો નકુચો તથા તિજોરી તોડવા ઉપયોગ લીધેલા હથિયાર તથા રોકડા રૂ.૧,૬૦,૦૦૦ રિકવર કર્યા હતા.જ્યારે ચોરીમાં સંડોવાયેલા સહ આરોપીઓને ઝડપી પાડવા તેમજ અન્ય મુદ્દામાલ રીકવર કરવા ચકલાસી પોલીસે તપાસ હાથ ધરી છે.
ઝડપાયેલા આરોપીનો ગુનાહિત ઇતિહાસ
ચકલાસી પોલીસે મહોળેલ ચોરીના ગુનામાં ઝડપી પાડેલા આરોપી રાજેન્દ્ર મહેન્દ્રસિંગ સરદારસીંગ સામે મહુધા પોલીસ સ્ટેશનમાં બે, ઓઢવ પોલીસ સ્ટેશનમાં બે તેમજ નિકોલ તથા અમરાઈવાડી પોલીસ સ્ટેશનમાં એક એક મળી કુલ ૬ ગુનામાં સંડોવાયેલો છે.
