વડોદરા, તા.1 શહેરના લાલબાગ બ્રિજ પર ગઇ રાત્રે બુલેટનો ચાલક રેલિંગ સાથે અથડાયા બાદ બ્રિજની નીચે પટકાતા તેનું કરૃણ મોત નિપજ્યું હતું.
પ્રાપ્ત માહિતી મુજબ શહેરના માણેજા વિસ્તારમાં ગુજરાત હાઉસિંગ બોર્ડ ખાતે સત્યનગરમાં રહેતો પ્રમોદકુમાર રોહિણીપ્રસાદ સેન (ઉ.વ.૨૭) પાલેજ ખાતે આવેલી કીર્તિ સ્કેમ્પી નામની કંપનીમાં નોકરી કરતો હતો. ગઇકાલે સાંજે તે પોતાનું બુલેટ લઇને જાંબુઆમાં પિતાની હેર સલૂનની દુકાને ગયો હતો અને બાદમાં તે નીકળી ગયો હતો.
બાદમાં રાત્રે તેમની સોસાયટીના પ્રમુખનો ફોન રોહિણીપ્રસાદ પર ગયો હતો અને જણાવેલ કે તમારો પુત્ર પ્રમોદ રાત્રે સવા દશ વાગે શ્રેયસ સ્કૂલથી લાલબાગ બ્રિજ પરથી પસાર થતો હતો અને બુલટેની સ્પીડ વધારે હોવાથી બ્રિજના ટર્નિગ વખતે અચાનક બુલેટ ડાબી બાજુની રેલિંગ સાથે અથડાયા બાદ તે બ્રિજની નીચે પટકાયો છે. રોહિણીપ્રસાદ તુરંત જ સયાજી હોસ્પિટલમાં દોડી ગયા ત્યારે તેમનો પુત્ર મૃત પામ્યો હતો. આ અંગે માંજલપુર પોલીસે ગુનો નોંધી કાયદેસરની કાર્યવાહી હાથ ધરી છે.
