માંગવાળા ડેમ પાસેથી વર્ષ – 2023 માં લાશ મળી’તી : એકાએક મૃતકની માતાને 2 વર્ષ પહેલાનો પુત્રીની લાશનો ફોટો ધ્યાને આવતા પોલીસને જાણ કરી : પતિની આકરી પુછતાછ કરતા પત્નીની હત્યાની કબૂલાત
અમરેલી : વર્ષ 2023માં અમરેલીના માંગવાપાળ ગામના ડેમ નજીકથી મળેલી એક અજાણી મહિલાની લાશનો ભેદ આખરે 2 વર્ષ બાદ ઉકેલાયો છે. પોલીસની સઘન તપાસ અને DNA રિપોર્ટના આધારે આ હત્યાનો પર્દાફાશ થયો છે અને મૃતક મહિલાના પતિએ જ તેની ઘાતકી હત્યા કરી લાશ ફેંકી દીધી હોવાનું સામે આવ્યું છે. અમરેલી તાલુકા પોલીસે આરોપી પતિની ધરપકડ કરી કાયદેસરની કાર્યવાહી હાથ ધરી છે.
આ સનસનાટીભર્યા કેસની વિગતો એવી છે કે, મૂળ દાહોદ જિલ્લાના કંથાગર ગામના વતની નવલીબેન રમેશભાઇ બારીઆએ પોતાની 40 વર્ષીય દીકરી સંગીતાના પતિ ભાવેશ કલ્પેશભાઇ કટારા (રહે. રાવળના વરૂણા, જિ. દાહોદ) વિરુદ્ધ પોતાની દીકરીની હત્યા અને લાશ ગુમ કર્યાની ફરિયાદ નોંધાવી હતી.
ફરિયાદમાં જણાવ્યા અનુસાર, ભાવેશ તેની પત્ની સંગીતાને અવારનવાર શારીરિક અને માનસિક ત્રાસ આપતો હતો. તા. 11/02/2023 થી તા. 16/02/2023 દરમિયાન નાના ભંડારીયા ગામે રહેતા હતા અને કોઇ અગમ્ય કારણોસર ભાવેશે પત્ની સંગીતાની હત્યા કરી નાખી હતી. આટલેથી જ ન અટકતાં, તેણે પોતાના ગુનાને છુપાવવાના ઇરાદે સંગીતાની લાશને સગેવગે કરી પુરાવાનો નાશ કરવાનો પ્રયાસ કર્યો હતો.
વર્ષ 2023માં જ્યારે સંગીતા અને તેનો પતિ ભાવેશ અચાનક ગુમ થઈ ગયા હતા, તે જ અરસામાં અમરેલીના માંગવાપાળ ગામના ડેમ પાસેથી એક અજાણી મહિલાની કોહવાયેલી હાલતમાં લાશ મળી આવી હતી. પોલીસે તે સમયે લાશના ફોટોગ્રાફ્સ લીધા હતા. તાજેતરમાં જ્યારે આ ફોટોગ્રાફ્સ ફરિયાદી નવલીબેનના ધ્યાને આવ્યા, ત્યારે તેમણે તે પોતાની ગુમ થયેલી દીકરી સંગીતાના હોવાની પ્રબળ શંકા વ્યક્ત કરી હતી. માતાની શંકાના આધારે પોલીસે તપાસનો ધમધમાટ શરૂ કર્યો અને તે સમયે મળેલા મૃતદેહના ડીએનએ સેમ્પલને નવલીબેનના ડીએનએ સાથે મેચ કરાવવાની તજવીજ હાથ ધરી. ડીએનએ રિપોર્ટમાં સ્પષ્ટ થયું કે, ડેમ પાસેથી મળેલી લાશ અન્ય કોઈની નહીં પરંતુ સંગીતાની જ હતી. આ વિસ્ફોટક ખુલાસા બાદ પોલીસની શંકાની સોય સીધી મૃતકના પતિ ભાવેશ કટારા પર જ ગઈ હતી.
DNA રિપોર્ટના મજબૂત પુરાવાના આધારે પોલીસે આરોપી પતિ ભાવેશ કટારાને દબોચી લીધો હતો. પોલીસ સૂત્રોના જણાવ્યા અનુસાર, ભાવેશે પોલીસને ગેરમાર્ગે દોરવાનો પ્રયાસ કર્યો હતો, પરંતુ પોલીસની આગવી ઢબે કરાયેલી ઊંડી પૂછપરછ સામે તે ભાંગી પડયો હતો અને પોતે જ પત્નીની હત્યા કરી હોવાની કબૂલાત કરી લીધી હતી
