વડોદરા, તા.4 નેશનલ હાઇવે પરના ટોલ પ્લાઝા પરથી પસાર થતા નોન કોમર્શિયલ વાહનોના ફાસ્ટેગ માટે વાર્ષિક પાસની શરૃઆત કરવામાં આવી છે પરંતુ કેટલાંક વાહનચાલકો આ વાર્ષિક પાસનો ઉપયોગ કોમર્શિયલ વાહનોમાં કરતા હોવાનું બહાર આવ્યું છે. આવા વાહનો સામે કાયદેસરની કાર્યવાહી કરવા માટે પોલીસમાં ફરિયાદ કરવામાં આવી છે.
નેશનલ હાઇવેના તમામ ટોલ પ્લાઝા પર હાઇવે મંત્રાલય દ્વારા રૃા.૩ હજારના વાર્ષિક પાસના ફાસ્ટેગની સ્કીમ અમલમાં મૂકવામાં આવી છે. આ વાર્ષિક પાસમાં એક વર્ષમાં દેશભરના નેશનલ હાઇવેના ટોલ પ્લાઝા પર ૨૦૦ વખત વાહન ક્રોસ કરી શકાય છે. આ સ્કીમ માત્ર નોન કોમર્શિયલ વાહનો માટે જ છે. પરંતુ કેટલાંક વાહન ચાલકો પૈસા બચાવવા અથવા કોઇ ક્રાઇમના હેતુથી વાર્ષિક પાસનો ઉપયોગ નોન કોમર્શિયલ વાહનોમાં પણ કરતા હોવાનું વડોદરા નજીક અમદાવાદ એક્સપ્રેસ હાઇવેના ટોલ પ્લાઝા પર ધ્યાનમાં આવ્યું છે.
પ્રારંભિક તપાસમાં ફાસ્ટેગના વાર્ષિક પાસનો દુરુપયોગ ત્રણ વાહનોમાં થતો હોવાનું જણાયું હતું. વાર્ષિક પાસ જે નંબર પર ઇસ્યૂ થયો હોય તે વાહનનો નંબર અલગ તેમજ ટોલ પ્લાઝા પરની સીસીટીવી કેમેરામાં નંબર પ્લેટ અલગ નંબરની જણાતા સમગ્ર વિગતોનો પર્દાફાશ થયો છે. હજી પણ અનેક ગાડીઓ આવા વાર્ષિક પાસનો ઉપયોગ કરતા હોવાનું બહાર આવ્યું છે. જો કે વાર્ષિક પાસનો દુરુપયોગ રોકવા માટે ટોલ પ્લાઝા તરફથી મંજુસર પોલીસ સ્ટેશનમાં અરજી આપવામાં આવી છે.
વાર્ષિક પાસનો દુરુપયોગ થતો હોવાનું બહાર આવતાં જ તંત્ર દ્વારા હવે દરેક વાહનો પર ચાંપતી નજર રાખવામાં આવી રહી છે. આ પ્રકારના વાહનો સામે તાત્કાલિક કાર્યવાહી હાથ ધરવામાં આવશે તેમ જાણવા મળ્યું છે.
